Каркçырми
Википедири материал
Каркçырми (Карк çырми), — Чăваш Енри Хĕрлĕ Чутай районне кĕрекен ял.
[тӳрлет] Истори
Ку яла епле пулса кайни пирки икĕ тĕрлĕ халап çӳрет.
Пĕр халапĕ тăрăх ял вырăнĕ питĕ çырма-çатраллă, шывлă вырăн пулнă, юнашарах вăрман ларнă. Çав çырма-çатрасенче карăксем пурăннă. Çавăнпа ăна пĕр вăхăт хушши Карăк çырми тенĕ, каярахпа ă саспаллийĕ тухса ӳкнĕ те Карк çырми пулса тăнă.
Иккĕмĕш халапĕ тăрăх юнашар вăрманта хура курак нумай пулнă. Çавăнпа ăна малтан Корак çырми тенĕ, вăхăт иртнĕ çемĕн Карк çырми теме тытăннă.
[тӳрлет] Урамсем
Ялта икĕ урам: Тĕп тата Вăрманкасси урамĕ. Тĕп урамĕ малтан пуçланса кайнă. Вăрманкасси урамĕ вырăнĕнче вара вăрман ларнă. Ял сарăлса пынипе вăрман касса çуртсем ларта пуçланă.
[тӳрлет] Ял вырăнĕсем
Паян кун та ялтан инçе мар вăрман ларать, çырма-çатрасем те сахал мар. Çав çырма-çатра ячĕсем те сыхланса юлнă:
- Утар çырми.
- Ванька варĕ. Ĕлĕкех унта Ванькка ани пулнă. Хуçи вилсен, анине никам та пăхманнипе çырмаланса кайнă. Çавăнпа çырмине «Ванька варĕ» тенĕ.
- Данила варĕ. Ĕлĕк унта Данила ани пулнă. Хуçи вилсен, анине никам та пăхманнипе вăл та çырмаланса кайнă. Çавăнпа çырмине «Данила варĕ» тенĕ.
- Вилнĕ çын варĕ. Виле тупăкĕн турпасĕсене кашни урам пĕр çырмана кайса пăрахса çунтарнă, çавăнпа та çав çырмана çапла ят панă.
- Сахмăрса
- Йӳçĕ.
- Хорăн вар. Унта çăлкуç пулнă тата пĕртен пĕр хурăн ӳснĕ.
- Коккăр вар.
- Така варĕ.
- Монча варĕ.
- Хăнатар (юханшыв ячĕ).
- т.ыт.те.