Sciappapetra
From Wikipedia
A sciappapetra (Polygonum maritimum) hè un fiori chì faci parti di a famiglia di i Polygonaceae. Nasci in a rena di u litturali, accantu à i piaghji, ma ancu à u cantu di i stradona. Hè alta 10 à 50 cm. Fiurisci da ghjugnu à aostu. I fiori sò chjucareddi (5 mm) è bianchi. T'hà una radica longa è fonda, chì li parmetti di stà in a rena calda.
[edit] In Corsica
A sciappapetra hè abbastanza cumuna in Corsica. U nomu corsu veni da u fattu ca a pianta hè rinumata par "sciappà a petra", vena à dì truncà è caccià i calculi, i cuncressioni minerali chì si formani in i rena o in a buscica. L'arba sciappapetra hè ancu chjamata a spaccapetra, chì t'hà listessu significatu. Ma par via di 'ssa prubità chì hè cunnisciuta ancu fora di Corsica, l'arba sciappapetra hè sradicata troppu suventi è diventa più rara. Par coglia la, ci voli à taglià la, lachendu a so radica in terra, è micca à sradicà la.
Si dici dinò (Conrad 1981) chì Nabulionu, chì suffria da i calculi, rigrittia d'ùn truvà l'arba sciappapetra in Santa Elena.
[edit] Da veda dinò
- a flora di Corsica
[edit] Rifarenzi
- Conrad, Marcella, I corsi è e piante salvatiche, avà è innanzi, 1981, Adecec
- Gamisans, Jacques (1996), A flora endemica di Corsica - La flore endémique de Corse , Edisud (in francesu)