Towel Day

Aus Wikipedia

Der Àrtikl is im Dialekt „Reichahòllarisch“ gschriem worn.

Da Towel Day (engl. fia Handduach-Dòòg) is a Gedenkdòg fia den Schriftstella Douglas Adams, wo am 11. Mai 2001 gstormm is. Ab dò is wejdweid jeds Joar am 25. Mai da Towel Day begånga worn.

An dem Dòòg schleppan a Hàffa vo seine Fans a Handdiache umanand. De Gestn hòd eanan Ursprung in dem Buach Per Anhalter durch die Galaxis, wo da unglaublich grouße praktische Nutzn vo am Handdiache auf Reisn im Universum foingdamassn bschriemm werd:

Im Reiseführa "Per Anhalter durch die Galaxis" hòds a bòòr Infos zum Thema Handdiacha. A Handduach, hoassts dò, is so ziemle des komodste, wòs ma òis interstellara Trèmpa dabei ham ko. Auf da oan Seitn hòds an groußn praktischn Wert - du kònnst de zum Wàrma drin eiwickln, wannst auf de kòidn Monde vo Jaglan Beta umanandahupfst; du konnst de draufleng, wannst an de strahlnd heijn Marmorsandstränd vo Santraginus V de berauschndn Dämpf vum Meer eischnaufst; du konnst drunta schlaffa, wann de roud gliahadn Stern vo de Wüstn vo Kakrafoon iba da leichtn; du konnstas òis Segl an a Minifloß bindn, wannst den schee schtaad vor si hi fliassadn Fluss Moth òbafahrst; nòòs iss a gschickte Waffn fiaran Nahkampf; um an Schèdl gwicklt schützts vor giftige Gase oda vorm Blick vom Vafressna Schnòdakäfa vo Traal (dò kànntst durchdrààhn, so deppad is des Viech, es moant, wannst du's ned siggst, konn's di àà ned seng - blèèd wiara Birschtn, òba vafressn wia no wòs); du konnst dei Handduach òis Notsignal schwinga, und nåtiarle konnst de aa damid òòtrickan, wanns nachand no sauba gnua ausschaugt. Vui wichtiga òba is da psychologische Wert vo a so am Handduach. Aus irngdam Grund is des aso, dass a Strag (a Strag is oana, der wo koa Trèmpa is), wann a dagneisst, dass a Trèmpa a Handdiache dabei hòd, automatisch davo ausgèht, dass da Trèmpa àà sunscht guad ausgrist is, òiso mid Zahnbirschtn, Waschlappn, Soaff, Blàzaldosn, Trinkflaschn, Kompass, Landkartn, Bindfònn, Mucknspray, Rengjackn, Raumãzug etc., etc. Weidahi werd da Strag àm Trèmpa freiwillig an jedn vo dene Artikl ausleing, und àà no an Haffa andane Sachan, de am Trèmpa gròd zuafèllig "abhandn kemma" san. Da Strag werd denga, dass ebba, der greiz und quer durch d' Galaxis trèmpt, an jedn Luxus hintlòsst, in de dreckadstn Eckn umanandagriacht, de grèßten Widrigkeitn trotzt, se schlussendle an sei Zui durchschlògt, und òllawei no woas wo sei Handduach is, auf jedn Fòi a ernstz'nemmada Kund is.

— Douglas Adams, Per Anhalter durch die Galaxis

[dro werkln] Warum da 25. Mai?

Beim Festleng vo dem Termin hòd koa bsundas historischs Datum a Rojn gspuit. Eha waars a Kompromiss, wei ma oanaseits den Gedenkdòg so bòid wia mèglich nòch seim Dood abhòitn woitt, andraseits òba a gwisse Vorlaufszeid notwendig war, dass ma des wejdweid bekanntmacha hod kenna. Da 25. Mai hòd se seitdem òis Gedenkdòg etabliert. Andane Termine, de im Hiblick auf Douglas Adams a Bedeitung ham, wààrn da 11. Februar (wo da 42. Dòòg vom Joar is), sei Gburtstdòg (11. März) und sei Sterbedòòg (11. Mai). Es is driaba dischkriert worn, dass ma oan vo dene fia 2002 òis neichn Termin festlegt, da 25. Mai hòd se åba schliassle durchgsetzt.

[dro werkln] Wòs ma mid dem Datum òiss ausrechna ko

Es is da letzde Dòòg im Joar, bei dem da Dòòg genau as Quadrat vom Monat is (25.5.: 5² = 25).
Aussadem is de Summ vo de Hexadezimalzòin 25 und 5, òiso 0x25 = 25₁₆ = 37₁₀ und 0x5 = 5₁₆ = 5₁₀ àggràdd 0x25 + 0x5 = 0x2A, wòs umgrechnt ins Dezimalsystem 0x2A = 2A₁₆ = 42₁₀ gèbt, òiso de weithi bekannte Antwort 42, um de si a eingne, èha scherzhaft betriemmne, Disziplin vo da Zahlenmystik drààht.

[dro werkln] Weblinks

• Towel Day Homepage (englisch)