Hollånd
Aus Wikipedia
 |
Der Àrtikl is im Dialekt „Ståd-Såizburgarisch“ gschriem worn. | |
Hollånd is a Deu vo de Niedalånde, der wås zwischn da Nordsee im Westn und im IJsselmeer im Ostn is. Im Nordn gehds bis zur Insl Texel, im Südn bis zum Delta vom Rhein, vo da Maas und vo da Schelde. Hollånd håd zwá Provinzn: Nordhollånd und Südhollånd. In Hollånd san de Großstéd Den Haag, Rottadåm und Amstadåm, de wås a Deu vo dem Ballungsraum san, der wås Randstad háßt; insgesåmt wohnan in Hollånd 6,1 Müllionan Leid. Im Westn, an da Nordsee, gibts an da Küstn so Sånddünen, im Ostn, am IJsselmeer, so flåche Poida. A Großdeu vo Hollånd is untam Meeresspiagü drunta.
Hollånd wår a Deu vom Römischn Reich, spéda vom Franknreich, dånn a Gråfschåft vom Heuling Römischn Reich (regierd vom Gråf vo Hollånd) und vo Burgund. Åb 1581 wår Hollånd a wichtige Provinz in da Republik vo de Siem Vaeinigtn Niedalånde, dé wåss bis zan Jåhr 1795 gém håd. In da Zeid vom Napoléon I. håds as Kinireich Hollånd gém (vo 1806 bis 1810), åwa då wårn üwahaupt de gånzn heiding Niedalånde dabei. Hollånd wår eh schon imma da wichtigste Deu vo de Niedalånde bei da Kuitur, bei da Gsöischåft und bei da Politik; damids néd imma går a so üwawichtig is, håms es im Jåhr 1840 in de zwá heiding Provinzn Nordhollånd und Südhollånd deud.
In Nåman Hollånd håms as erschte Måi im Jåhr 866 åis Holtland (Hoizlånd, Wåidlånd) hergnumma fir de Géngt um Haarlem umadum.
Im Språchgebrauch af Hochdeitsch und á af Boarisch sågt ma oft Hollånd, wåmma eingtli d'Niedalånde mánt. Dés is scho am End vom 16. Jåhrhundat afkumma, wias de Republik vo de Siem Vaeinigtn Niedalånde gründt håm, und då wår håid Hollånd áfåch de wichtigste Provinz. Nu stärka is des åwa in Deitschlånd in 1970er- und 1980er-Jåhr worn, weu då håm de großn Baun vo Hollånd mid ana urntlichn Werbekampagne gschaud, dass is schlechte Image vom niedaländischn Treibhauszeigs wegbringan. Eana Werbefigur wår då de "Frau Antje" midn Spruch "Kás und Gmias - Qualität vo Hollånd", und dé is zeidweis in Deitschlånd bekånnta gwén åis wia eana Kinigin, d'Beatrix.
