Real Zaragoza

De Biquipedia

Real Zaragoza SAD

Ziudat	Zaragoza
País	Aragón
Añada d'establimiento:	1932
Estadio  - Nome  - Inagurazión  - Aforo	A Romareda 1957 34.596
Abonatos:	30.000
Presupuesto:	40.000.000 €
Temporadas  - Primera  - Segunda  - Segunda B  - Terzera	52 15 0 4
Tetulos	6 Copas d'o Rei 1 Supercopa d'España 1 Recopa d'Europa 1 Copa de Ferias
President	Eduardo Bandrés
Entrenador	Manolo Villanova
Primera Equipazión 　 Segunda Equipazión
www.RealZaragoza.com

O Real Zaragoza ye un club de fútbol aragonés, con sede en a ziudat de Zaragoza. Estió establito en 1932 e autualment chuga en a Primera Dibisión d'a Liga española de fútbol.

Contenius 1 Istoria 1.1 Antezedents 1.2 Fundazión 1.3 Decada d'os 40 e os 50 1.4 Decada d'os 60 1.5 Decada d'os 70 1.6 Decada d'os 80 1.7 Decada d'os 90 1.8 Años 2000 1.9 75 años d'istoria 2 Equipazión 3 Estadio 4 Plantilla 2007/2008 5 Chugadors famosos 6 Inno 7 Datos d'o club 8 Palmarés 9 Real Zaragoza B 9.1 Estadio 9.2 Datos 10 Enrastres esternos

[editar] Istoria

[editar] Antezedents

En 1903, á penar d'o esconoximiento cheneral d'a soziedat sobre o fútbol, naxe o primer equipe local, o Zaragoza Fútbol Club, á on á lo prenzipio se impartiban as nozions alazetals d'iste esporte ta mirar de reunir prous chugadors ta formar o equipe. Manimenos, a bersión moderna de dito equipe estió establita en 1921 por un grupo de estudiants de merezina e rezibe un nombre diferent, Zaragoza CD, anque con o mote d'os "tomates" por o suyo uniforme royo. Entre 1924 e 1925 o equipo se fusiona con os equipes menors Fuenclara e Stadium, alquiriendo mayor fuerza aintro d'o fútbol local e tamién trestallando-lo ya que esistiba antimás atro equipe en a ziudat o Iberia SC.

O Iberia S.C. naxe tamién en os primers años d'o sieglo XX e se combierte en o equipe dominador d'o fútbol local por a suya estrutura, ya que atrayeba gran cantidat de publico á los partitos e premitiba a partizipazión d'o seutor popular en as suyas filas. A iste equipe le'n metioron o mote d'os "brispas". Abió dos oportunidaz mientres os suyos primers años de puyar á la primera dibisión española, anque á la fin no se consiguió.

[editar] Fundazión

O club estió establito lo 18 de marzo de 1932 dezaga la esaparixión d'o Iberia SC e o Zaragoza CD como consecuenzia d'os suyos problemas economicos e demanda por parti d'a Federazión aragonesa d'un gran club. En a temporada 39-40, dezaga la Guerra Zebil, o Real Zaragoza chugó por primera begata en Primera dibisión. Estió en ixa decada cuan o Real Zaragoza reunió a suya primera chenerazión destacata de chugadors, a conoxita como "Los Alifantes". Se diz que o mote d'Alifantes aparixió mientres d'un partito en Barzelona contra o Júpiter, cuan o Real Zaragoza ganaba por 0-3 un periodista aragonés sintió que un afizionato local deziba -"ye imposible meter-les un gol, son como Alifantes"-, debito segurament á la gran altaria d'os chugadors aragoneses, barios por denzima d'1'90. En l'año 2007 se celebró lo 75 cabo d'año d'o naximiento d'o club.

[editar] Decada d'os 40 e os 50

En as dos siguients decadas, os 40 (dita A epoca negra) e os 50 (carauterizata por o equipe dito "Los millonarios") o Real Zaragoza dondió por o Campionato de Liga puyando e baxando de contino entre primera e segunda dibisión. En a decada de 1940-50, o equipe bibe a suya pior etapa. Primero desziende á Segunda Dibisión dezaga de dos años en Primera. Anque tornó á la primera categoría en un año, baxo atra begata e dica l'año 1951 no tornarba á Primera (o mesmo año en o que adotaba a definizión de "Real" Zaragoza) baxando encluso á Terzera Dibisión en 1947. Á la fin d'os 40 e prenzipios d'os 50 marcarba la epoca de "Los Millonarios", debito á la gran cantidat de diners que o president Julián Abril imbirtió en os chugadors, pero belas tensions en a plantilla fazioron que ista epoca remata-se con a tornata á Segunda Dibisión en l'año 1953.

[editar] Decada d'os 60

Ye en a decada d'os 60 cuan o club bibe os suyos millors años con o mitico equipe d"Os Magnnificos", debantera formada por Canario, Santos, Marcelino, Villa e Lapetra, que leboron á lo equipe á cuatro finals de Copa d'o Rei, (en 1963, 1964, 1965 e 1966) d'as que ganoron dos (1964 contra l'Atlético de Madrid 1-2 con gols de Lapetra e Villa; e 1966 frent a l'Athletic de Bilbao con gols de Villa e Lapetra atra begata), á dos finals d'a Copa de Ferias (1964 e 1966) d'a que ganarban a primera contra o Valencia CF con gols de Villa e Marcelino, e una semifinal d'a Recopa de Europa (1965, estando redotatos por o West Ham Utd anglés).

[editar] Decada d'os 70

En a decada d'os 70 e de man de José Ángel Zalba, aparixe atro equipe que marcó una epoca en o Club: "Os Zaraguayos", ditos asinas en onor á los chugadors uruguayos e paraguayos que formaban parti d'ixe equipe; "Cacho" Blanco, Soto, "Lobo" Diarte, Ocampos e "Nino" Arrua, iste zaguero nombrato allora o millor chugador d'America, estando lo lider d'o equipe. Anque o suyo chuego les fazió famosos, de man d'o entrenador Luis Cid Carriega, no consiguioron dengún tetulo, estando un sozcampionato de copa en 1976 o suyo millor momento. Estió en ixa epoca en la que se otenioron os millors resultatos en a Primera dibisión española, terzeros en a temporada 1973/74 e segundos en a 1974/75 sozcampiones, (encara se remera o 6-1 contra o Real Madrid, en dita temporada). Ista racha remató con o deszenso d'o equipe en 1976/77, puyando á primera atra begata en a temporada siguient.

[editar] Decada d'os 80

En la decada d'os 80 a trayeutoria esportiba estrio prou regular, estando los unicos trunfos destacables a Copa de 1986, ganata á lo FC Barcelona e a semifinal d'a Recopa d'Europa en 1987, á on estioron eliminatos por l'Ajax d'Amsterdam. En 1988 dixo a presidenzia d'o club Miguel Beltran e José Ángel Zalba se combirtió atra begata en president.

[editar] Decada d'os 90

En 1991 e baxo a presidenzia de José Ángel Zalba prenzipia á entrenar por primera begata Víctor Fernández como entrenador de primera dibision, en 1992 o club ha de combertir-se en Soziedat Anonima, e ye en ixe inte cuan remata a presidenzia de José Ángel Zalba e Alfonso Soláns pai crompa a mayor parti d'as aizions d'o club. Con un choben Víctor Fernández como entrenador en a temporada 1991/1992 o equipo se clasifica en UEFA e prenzipia asinas una etapa de esitos: en 1993 s'alcanza a sietena final de Copa, que remata con una redota frent á lo Real Madrid; en 1994 se gana a copa á lo Celta de Vigo en penalties e quedan terzers en a Liga. Manimenos ye o 10 de mayo de 1995 cuan o Zaragoza otiene o suyo mayor trunfo: en o Parque d'os Prenzipes de París gana a l'Arsenal FC por 2 á 1, proclamándo-se campión d'a Recopa d'Europa. Ista bitoria estió encara más important porque se logró lo 2-1 á 10 segundo d'a fin d'o partito con un gol de Nayim dende a metat d'o campo, á más de 60 metros. Iste equipe estió clamato a "Quinta de París" e l'11 tetular yera formato por: Cedrún, Belsué, Cáceres, Aguado, Solana, Nayim, Poyet, Aragón, Higuera, Esnáider e Pardeza. A l'año siguient se chugó a Supercopa d'Europa pero se perdió contra l'Ajax d'Amsterdam.

En 1996 Alfonso Soláns fillo se combirtió en president d'a entidat, prenzipiando una epoca de piors resultatos economicos e esportibos, eszeuto un buen puesto en a temporada 1999/2000 d'a Liga.

[editar] Años 2000

En ista epoca o equipe chuga tres finals de Copa: en 2001, á on ganará á lo Celta de Vigo por 1-3, en 2004 cuan benze á lo Real Madrid por 3-2 e en 2006 á on pierde con o RCD Espanyol por 4-1. En meyo en a temporada 2001/02 baxa á Segunda Dibisión tornando á la primera categoría la temporada siguient. E en la temporada 2004/05 se gana la Supercopa d'España á lo Valencia CF, dimpués de perder por 0-1 en La Romareda e ganar en Mestalla por 1-3.

En a temporada 2006/07 o club cambea de propietario, estando agora o empresario Agapito Iglesias o masimo aizionista e Eduardo Bandrés o nuebo president, tornando Víctor Fernández á lo banquet. En a primera temporada d'o nuebo president, o club consigue a clasificazión ta chugar a Copa d'a UEFA abendo quedato en a seisena posizión en o Campionato Nazional de Liga.

O Real Zaragoza ficha en a primera temporada d'Agapito Iglesias e Eduardo Bandrés á seis chugadors: Aimar, Diogo, Sergio Fernández, Piqué, D'Alessandro e Juanfran. Tamién se produze un cambeo en a estrutura almenistratiba d'o club destacando a baxa de Jerónimo Suárez como direutor cheneral e l'alta de Manuel de Miguel como direutor de comunicazión.

En a temporada 2007-2008 o Real Zaragoza encorpora en o berano á güeito chugadors: López Vallejo, Ayala, Pavón, Matuzalem, Gabi, Paredes, Oliveira e Luccin.

[editar] 75 años d'istoria

O club cumple en 2007 os 75 años d'istoria, e o club organizó dibersos autos ta zelebrar-lo. En a parti esportiba, antimás d'a gran temporada que reyalizó lo equipe, o 18 de marzo de 2007 se zelebró un fiesta en La Romareda con un partito omenache entre o Real Zaragoza e l'At.Madrid.

[editar] Equipazión

• Primera Equipazión: Camiseta blanca, pantalóns azuls e calzas blancas.
• Segunda Equipazión: Camiseta a rayas negras e amariellas, pantalóns e calzas negra.

[editar] Estadio

O estadio d'A Romareda s'inaguró con un partito entre o Real Zaragoza e l'Osasuna o 8 de setiembre de 1957, estando president d'o club maño Cesáreo Alierta. Ganoron os locals 4-3 con gols de Vila (o primer gol en a Romareda), Wilson, Murillo e Vila por segunda begada e Areta, Gabino e Glaría t'os foranos.

O campo abió dibersos alinies en 1977, cuan se construyoron os nuebos escalerons cubiertos de Norte e Sur e en 1982 cuan se construyoron as cubiertas de cheneral posato debito á que serba sede d'o Mundial d'España '82. As zagueras obras se reyalizoron en 1994 ta adecuar-ne á la normatiba d'a UEFA que obliga a tener todas as localidaz de posiento.

[editar] Plantilla 2007/2008

No. Posizión Chugador 1 POR César Sánchez 2 DEF Carlos Diogo 3 DEF Paredes 4 DEF Cuartero 5 MED Óscar 6 DEF Roberto Ayala 7 MED Peter Luccin 8 MED Pablo Aimar 9 DEB Sergio García 10 MED Andrés D'Alessandro 11 DEF Juanfran 12 DEB Ricardo Oliveira

No. Posizión Chugador 13 POR Miguel 14 MED Gabi 15 DEF Pavón 16 MED Celades 19 DEF Generelo 20 MED Matuzalem 21 MED Zapater (capitán) 22 DEB Diego Milito 23 DEF Sergio Fernández 24 DEF Chus Herrero 25 POR López Vallejo

[editar] Chugadors famosos

Belsué Lapetra Güerri Villaroya José Luis Violeta Víctor Muñoz Javier Planas Abad Carlos Chaínho Juan Barbas Esnáider Luciano Galletti Kily Gustavo López Gaby Milito Marcelo Trobbiani

Jorge Valdano Cafu Sávio Canario Gustavo Nery Patricio Yañez Brehme Frank Rijkaard Toro Acuña Raúl Amarilla Arrúa Chilavert Lobo Diarte Ocampos Sigifrido Martinez

Juan Seminario Luis Redher Miguel Rebosio Radimov Milošević Aguado Aragón Cedrún Dani García Josep Gonzalvo Juli Gonzalvo Marià Gonzalvo Paquete Higuera Juanmi Marcelino

Nayim Santos Paco Jémez Pardeza Reija Santamaría Señor Fernando Morientes Juan Manuel Villa David Villa Pichi Alonso Vizcaíno Yarza Poyet Rubén Sosa

[editar] Inno

A mosica e a letra son de Juan Ignacio Notario Romeo:

Inno en castellán (ofizial) El Zaragoza va a jugar El Zaragoza va a vencer El Zaragoza va a luchar por su afición Y los mañicos auparán a los blanquillos del león Azul y blanco es el color del campeón Estrebillo: Aúpa Zaragoza Arriba y a vencer Palmadas al viento que gitan ganareis La raza en el juego Nobleza y valor Bandera y orgullo de nuestro Aragón La Romareda vibrará y el cachirulo se alzará como un gigante es el equipo aragonés El Zaragoza es la afición con once grandes del balón y una leyenda con trofeos al mejor Estrebillo A ganar, a ganar, El Zaragoza va a ganar A ganar, a ganar, El Zaragoza ganarará A ganar, a ganar, El Zaragoza va a ganar A ganar, a ganar, El Zaragoza ganarará

Inno en aragonés (no ofizial) O Zaragoza ba á chugar O Zaragoza ba á benzer O Zaragoza ba á luitar por a suya afizión e os mañicos puyarán á os blanquillos d'o lión azula y blanca ye a color d'o campión Estrebillo: Aupa Zaragoza Entalto e á benzer Chapadas ta l'aire que chilan ganarez A rasmia en o chuego Nobleza e balor Bandiera e argüello d'o nuestro Aragón A Romareda bibrará e o cachirulo bandiará como un chigant ye o equipe aragonés O Zaragoza ye l'afizión con onze grans d'o pilotón e una leyenda de trofeyos t'o millor Estrebillo Á ganar á ganar, O Zaragoza ba á ganar Á ganar, á ganar, O Zaragoza ganará Á ganar á ganar, O Zaragoza ba á ganar Á ganar, á ganar, O Zaragoza ganará

[editar] Datos d'o club

• Temporadas en 1ª:53
• Temporadas en 2ª:15
• Millor posizión en a liga: 2º (temporada 74-75)
• Pior posizión en a liga: 20º (temporada 01-02)

[editar] Palmarés

• 6 Copas d'o Rei
• 1 Supercopa d'España
• 1 Recopa d'Europa
• 1 Copa de Ferias

[editar] Real Zaragoza B

O Real Zaragoza B, d'antis más dito Deportivo Aragón, ye l'equipe filial d'o club. Estió establito en 1965 e chuga autualment en Terzera dibisión (Grupo XVI).

[editar] Estadio

Ziudat Esportiba d'o Real Zaragoza, con capazidat ta 2.500 espeutadors.

[editar] Datos

• Entrenador: Pascual Sanz
• Temporadas en 2ª: 1
• Temporadas en 2ªB: 19
• Temporadas en 3ª: 16
• Enguerada en Segunda dibisión: 85-86
• Millor posizión en a liga: 18º (Segunda dibisión temporada 85-86)
• Pior posizión en a liga: 18º (Segunda dibisión temporada 85-86)

[editar] Enrastres esternos

• www.RealZaragoza.com, pachina ofizial d'o club.
• www.AupaZaragoza.com, pachina NO ofizial d'o club.
• www.nuestrozaragoza.com, pachina NO ofizial d'o club.
• www.pasionzaragocista.com, pachina NO ofizial d'o club.

Primera dibisión española
UD Almería | Athletic de Bilbao | Atlético de Madrid | FC Barcelona | Betis | Deportivo | RCD Espanyol | Getafe | Mallorca Levante | Osasuna | Racing de Santander | Real Madrid | Real Murcia | Real Zaragoza | Recreativo de Huelva | Sevilla | Valencia | Valladolid | Villarreal

Terzera dibisión Grupo XVII
Andorra | Balbastro | Binéfar | Brea | Calatayú | Cuarte Industrial | Ebro | Exea | Figueruelas | Fraga | Illueca | Jacetano | Monzón | Peñas | San Lorenzo | Samianigo | Sariñena | Tergüel | Utebo | Villanueva | R. Zaragoza B

Esporte d'elite en Aragón
Selezions: Selezión de fútbol | Selezión de balonzesto | Selezión de balonmán
Balonmán: CAI Balonmano Aragón | BM Forcusa Huesca
Balonzesto: CAI Zaragoza | Mann Filter Zaragoza | CAI Huesca la Magia
Boleibol: CAI Voleibol Teruel | Club Voleibol Zaragoza
Fútbol: Real Zaragoza | Transportes Alcaine | SD Huesca
Fútbol Sala: DKV Zaragoza | Bajo Aragón Caspe | Horcona Pinseque | Mainfer Zaragoza
Hockey chelo: Club Hielo Jaca
Waterpolo: Waterpolo Pla-Za | Escuela Waterpolo Zaragoza