Nou Barris

De Biquipedia

Nou Barris (Nueu Bicos en aragonés) ye un destrito de Barzelona situato n'a estrimera norte d'a ziudá, entre ra sarra de Collserola y l' abenida d'a "Meridiana". Autualmén se composa de catorze barrios: Can Peguera, Canyelles, Ciutat Meridiana, Guineueta, Porta, Prosperitat, Roquetes, Torre Baró, Torre Llobeta, Trinitat Nova, Turó de la Peira, Vallbona, Verdum y Vilapicina.

Istos barrios, que mayoritariamén son situatos en lo que istoricamén establizían as redoladas d'os monezipios d'Horta y Sant Andreu de Palomar (e más tardi de Barzelona), crexioron á lo largo d'o sieglo XX, espezialmén entre ras decadas d'os zincuanta, sisanta y setanta.

En 1998 o destrito eba una superfizie de 800,2 etarias e una poblazión de 168.837 abitans, abendo perdito más de bente mil abitans en poco más de siet añadas. N'as zagueras añadas, o destrito ha tornato a estar una d'as redoladas d'acullida d'a zereña corrién inmigratoria dende ro 2000, debito á ro pre relatibamén más baxo d'a bibienda n'o destrito, transformando ra composizión etnica y o rete de comerzios d'os barrios.

Mientres os nobanta, a chirazión en educazión feita n'a decada anterior prenzipió á tener efeuto, e ra zifra de poblazión sin estudios n'o destrito cayó d'o 26,7% (1991) á ro 23,1% (1996), aumentando espeutacularmén o numero de tetulatos en educazión secundaria y superior. En cuanto á ro conoximiento d'o catalán, á meyatos d'a decada ya yera replecau per o 92,8% d'a poblazión, e dos terzios lo podeban fablar.

Politicamén, o destrito bibió una zereña autibidá menata per os ligallos de bezíns mientres tot o franquismo, en respuesta á ro urbanismo espachinato y os desequilibrios d'o desembolico d'os sisanta y setanta. Mientres a democrazía, o destrito ha estau un granero de botos sozialistas, superando abitualmén más d'o zincuanta per ziento d'os sufraxios.

O nome d'o destrito se dió en l'añada 1984 cuan o Conzello de Barcelona emologó una nueba dibisión territorial d'a ziudá, emplegando ra denominazión d'a rebista d'o primer ligallo de bezíns d'a redolada a prenzipios d'as añadas setanta. Se da ro feito de que una parti impotán de Nou Barris yera dentro de l'antigo Districte 9, chuntamén con parti de l'autual Sant Andreu.

Una d'as construzions más antiguas d'o destrito se corresponde á l'antigo Espital Mental d'a Santa Creu i Sant Pau, l'autual sede d'o destrito. Formó parti d'o proyeuto merico d'o Dr. Pi i Molist e o proyeuto d'arquiteutura espitalaria de l'arquiteuto Josep Oriol Bernadet (1811-1860). A propuesta se presentó en 1859, anque no se construyirá dica l'añada 1888. En 1960 se bendió y xerbigó a metá d'o edifizio debito a ra espiculazión urbana, anque ro espital mental continó operatibo dica ra decada de 1990. En l'autualidá, o edifizio ye en emplego per o Archibo Monezipal d'o Destrito de Nou Barris, o Consello Monezipal d'o Destrito de Nou Barris e ra Biblioteca Popular de Nou Barris, una d'as más grans d'a ziudá.