Diseño

De Biquipedia

O diseño ye a representazión grafica e calculo d'as dimensions d'un ocheto con a fin de definir-lo unibocament e fer-ne posible a suya construzión. Autibidat endrezata á consiguir a produzión en serie d'ochetos útils e politos.

Prozeso prebio, de confegurazión mental, en a busca d'una soluzión en os campos d'as artes aplicatas, a incheniería e l'arquiteutura. Como berbo, se refiere á lo prozeso de creyazión d'un nuebo ocheto u meyo de comunicazión enfilato á estruturar e confegurar contenitos que premiten estar usatos ta satisfer nezesidaz espezificas d'os sers umans. Como sustantibo, se refiere á lo produto final fruito d'o prozeso de diseñar, entendiendo-se cualsiquier forma de representazión; un debuxo, una maqueta, un plan u una descrizión teunica.

Diseñar requiere de condizions funzionals e esteticas. S'amenistan numerosas fases de rechira, analisis, modelato, achustes e adautazions prebias á la produzión d'un ocheto u sistema grafico. Antimás, repleca multitut de disziplinas pendiendo de l'ocheto u produto á diseñar, estando as prenzipals: o diseño grafico, o diseño industrial, o diseño tèxtil u de moda e o diseño d'espazios u arquiteutura. O suyo campo d'autuazión tién relazión con a industria e o comerzio e, como fenomén sozial, con a cultura.

L'orichen d'o diseño se troba en os antigos ofizios d'artesans, d'os cualos deriba á la fin d'o sieglo XIX con a reboluzión industrial e a produzión en cadena de produtos.

Asobent s'entiboca á diseñadors con artistas, por o común denominador que representa la creyatibidat en os dos campos. Manimenos, o diseñador proyeuta un diseño en funzión d'un encargo e ta una finalidat concreta, chustificando razionalment as suyas aizions. A produzión artistica, por atro canto, ye más espontania e as suyas aizions no pretenden estar chustificatas.

Á ormino gosa emplegar-se o termín diseño de forma entibocata como sinonimo de buedo, superfluo, ornamental, u bien ta emfatizar a esferenziazión u carauter innobador d'un ocheto.