Câté
From Wikipedia
|
Ch't' articl'ye fut c'menchie en Jèrriais
 |
Un câté ou châté est un bâtisse pouor la d'fense d'un pays. Dans les touos vièrs temps nou faîthait des banques et des droves pouor protégi l'copé d'un mont, ofûche auve eune paliéthe sus - ch'est des câtchieaux.
Cont'nu |
[amendaer] Les Romains
Les Romains griyaient des camps militaithes (en Latîn: castrum) dans les pays contchéthis et des tours ou p'tits forts à l'entou avaient nom castellum. V'là tch'est l'originne des mots câté et châté.
[amendaer] Lé Mouoyen Âge
Auve lé partage d'l'Ûrope en difféthents pays auprès la tchête d'l'empithe Romain, les seigneurs bâtissaient des châtchieaux pouor protégi lus fieux.
Au 11e siècl'ye la manniéthe dé châté à la motte et la baillie 'tait pratitchie en France et en Nouormandie car ch'tait bein aîsi d'les bâti quédaine en otchupant du tèrrain. La motte 'tait un mondrîn fortifié, dé couôteunme auve eune tou sus, et à bas un bel enmuthailli (la baillie) à la baillie d'la tou - ch'est en tchi les cheins dans la tou pouvaient tither sus autchun attatchant, la baillie 'tait à portée d'arme.
Duthant la Contchête Nouormande les Nouormands bâtîtent un tas d'ches châtchieaux en Angliétèrre.
Pus tard en Ûrope, les châtchieaux d'vîntent pus forts auve des grôsses muthâles en pièrre.
[amendaer] La fîn du châté
À la siette d'l'întroduction d'la poudre à canon en Ûrope, les vièrs châtchieaux n'pouvaient d'aut' sténer ches attaques - les hautes muthâles tch'entouothaient lé d'dans n'résistaient pon à des cos d'canon. Des fort'rêsses géométriques rempliaichaient par des bords les vièrs châtchieaux, et l's êtats pustôt centralîsés ès 16e et 17e siècl'yes n'atchilyaient d'aut' les p'tits seigneurs et lus châtchieaux. Bein des châtchieaux fûtent dêtruits ou transformés en grandes maîsons (un châté Français tch'est pustôt un mangni ou un palais).
[amendaer] Lé châté ravigoté
La mode du Néo-Gothique d'vièrs la fîn du 18e siècl'ye et duthant l'19e siècl'ye êmoûtchait l'èrbâtithie ou la restaurâtion pustôt fantastique dé châtchieaux en d'lacres, et l'architectuthe des châtchieaux înspithit des nouvieaux bâtisses tchi r'sembliaient à des châtchieaux (par exempl'ye, lé Collège Victoria en Jèrri.
[amendaer] Des châtchieaux
[amendaer] Angliétèrre
- Tou d'Londres
[amendaer] Nouormandie
[amendaer] Bâsse Nouormandie
- Châté d'Caën
[amendaer] Guernési
- Châté du Valle
[amendaer] Jèrri
[amendaer] Viyiz étout
- Krémlîn
