Amerigo Vespucci
Vun Wikipedia
Amerigo Vespucci (* 9. März 1454 in Florenz; † 22. Februar 1512 in Sevilla) weer en italieenschen Seefohrer. Na em is de Kontinent Amerika nöömt.
Vespucci is 1454 in Florenz as drüdd Kind in en rieke Familie boren. Sien Vadder weer Notar vun de Geldwessler-Gill vun Florenz. Vespucci dee bi Lorenzo di Pierfrancesco de' Medici dat Arbeiden anfangen un arbeidt vun 1492 af an in Medici sien Kontoor in Sevilla.
Later hett Medici em op Reis na de in’n Westen nee opdeckten Lannen (wat later Amerika heten schull) schickt, dat he utkundschaft, wat dor Geld to maken weer.
Na siene drüdde Reis na Westen vun Mai 1501 bet September 1502 hett he en Bericht an Medici schreven, de later as Mundus Novus rutkamen is (1506 as Van den nygen Insulen und Landen in’t Plattdüütsche översett). Na de veerte Reis hett he wedder en Bericht schreven, de as Quattuor Americi Vespucci Navigationes rutkamen is.
In dat 18. Johrhunnert hebbt se noch dree Breef vun Vespucci an Medici funnen. Een harr he na siene twete Reis schreven, een to Anfang vun siene drüdde Reis op de Kapverden un een na de drüdde Reis in Lissabon.
Afsehn vun siene Berichten un Breev is nich veel över Vespucci sien Reisen bekannt. Blot twee vun siene veer Reisen laat sik dör annere Oorkunnen bestätigen. Historikers meent, Vespucci is wohrschienlich toeerst in’n Juni 1497 tohoop mit Juan de la Cosa na Amerika wesen. Siene twete Reis weer 1499/1500 mit Alonso de Ojeda. De drüdde Reis weer 1501/1502 in portugeesche Deensten. Vun siene veerte Reis 1503/1504 weet wi meist gornix. Sien Bedüden liggt woll mehr dor in, dat he de ne’e Welt dör siene Berichten in ganz Europa bekannt maakt hett.
1508 hett de König vun Spanien em as Grootstüürmann insett un em to’n Baas vun de spaansche Navigatschoonsschool maakt. 1512 is Vespucci vun de Malaria doodbleven.
Dat italieensche Segelschoolschipp Amerigo Vespucci is na en nöömt.
