Ami Chandra
Wikipedia se
| Fiji ke Hindustani |
Pandit Ami Chandra Vidyalankar (1900 - 13 March 1954), 1927 me India se Fiji Arya Samaj school me parrhae khatir lawa gae rahaa . Uu Fiji me teacher ke kaam ke sanghe Arya Samaj teacher, union ke leader, football ke administrator, scout leader aur marriage officer bhi rahaa. Uu Fiji khatir primary school level ke book likhis aur Legislative Council ke member bhi raha. Uske Fiji ke sab jaati ke logan manat rahin.
vishay suchi |
[badlo] Sikchha me yogdaan
Panditji Gurukul, Kangri in India ke graduate rahaa, aur jab 22 December 1927 me uu Fiji paucha tab uske Suva Town Hall me swagat karaa gais rahaa. Panditji Saweni, Lautoka me Gurukul Primary School me parrhae ke suruu karis. 1928 me uu Principal banis aur uske niche boarding school suruu karaa gais jisme 45 larrkan rahat rahin, jab ki school me kul jorr 140 students log parrhat rahin aur isme 25 Kaiviti students bhi rahin. Uske achchha kaam ke khatir Governor, Sir Murchison Fletcher se bhi uske badhaai mila 1930 me uu Suva gais aur Arya Samaj Girls School ke Samabula me suruu karis. Baad me uu Ba gais aur Arya Kanya Pathshala ke suruu karis. 1950 me uu ek post primary classes Ba me suruu karis jon ki aage chal ke, 1952 me, Dayanand Ango Vedic College of Ba ban gais.
Ba me Panditji ke Colonial Sugar Refining Company (CSR) uske kulambar logan ke Hindi parrhae ke khatir madat karis. Uske Fiji me sikchha ke sab se barraa yogdaan Hindi Ki Pothi rahaa jisse Fiji ke Hindustani larrkan logan Hindi easily sikhe sakin.
[badlo] Union leader
Panditji 1929 me Fiji Teachers Union suruu karis rahaa and iske pahila President rahaa. Uu bahut union ke leader ke madat karis rahaa aur Chini Mazdur Sangh aur Gold Mine Workers Union ke suruu kare me madat karis rahaa. Uske Fiji ke sab logan biswas karat rahin aur jab 1943 me Kisan Sangh dui faction me split hae gae rahaa tab duuno side Pabitji ke Sangh ke book audit kare khatir raaji bhay rahin. Uu Fiji Industrial Workers Congress (jon kis aaj Fiji Trades Union Congress hai) ke president bhi rahaa. Uu multi-racial trade union ke support karis aur trade union ke politics me part le ke virod karat rahaa.
[badlo] Ba Football Association
1935 me, CSR ke madat se Panditji Ba Indian Football Association suruu karis rahaa jisme 1940 tak chaar team league tournament me khelat rahin.
[badlo] Legislative Council ke member
1947 se 1950 tak Panditji Legislative Council ke ek nominated member rahaa aur uu Vishnu Deo ke saathe kaam karis.
[badlo] Paditji ke yaad
Panditji ke maut 13 March 1954 me Singapore me ek plane ke gir jaae se hoe gais, jab uu Engliand jaat rahaa British Trades Union Congress se mile. 28 August 1956, Arya Samaj ke Golden Jublee celebtation time uske Dayanand Medal (mare ke baad) mila. 1957, Tawakubu, Lautoka ke log uske yaad me ek school Ami Chandra Memorial School suruu karin. Panditji ke saadi Sarvati Devi ke saathe bhais rahaa aur uske paas chaar larrkin Saroj, Jyan, Pushpa aur Om rahin.
