Huà-lìng Sê
Lài-nguòng: Wikipedia
Huà-lìng-sê (華林寺) diŏh Hók-gióng Hók-ciŭ-chê Bìng-săng nàng sié, kiá ṳ̀ Báe̤k-sáung Gièng-dáik nê nièng (964 nièng), ĭ gì duâi dâing sê nàng buô Dṳ̆ng-guók hiêng còng dék gô gì chà gióng-dé̤ṳk, ùi Cuòng-guók Dê̤ṳng-diēng Ùng-ŭk Bō̤-hô-dăng-ôi.
[Siŭ-gāi] Lĭk-sṳ̄
Mìng-guók miĕk-uòng ī-hâiu, Ngù-uŏk-guók guók-uòng Cièng Lièu ciéng-liāng Hók-gióng, Hók-ciŭ Góng-siū Bàu Siŭ cà̤ Mìng-uòng gṳ̆ng-dâing tiék kó̤, ciŏng diông â gì cài-liêu dò̤ gáu Bìng-săng nàng sié kiá 'Uŏk-săng Gék-siòng Sê-iêng' (越山吉祥寺院), kiá ô Ùng-chŏng-gó̤h, Pū-dò̤-sê gâe̤ng ciáng-dâing dēng gióng-dé̤ṳk, cêu sê gĭng-dáng Huà-lìng-sê gì cièng-sĭng. Cĭ-hâiu, bô kiá gì-tă gióng-dé̤ṳk. Sáung-gŏ̤-cṳ̆ng ô sé̤ṳ ngê̤ṳ-cṳ̆ 'Uŏk Săng', 'Kuàng Hŭng' ké̤ṳk ciā sê.
Mìng Ciáng-tūng gāu nièng (1444 nièng), ngê̤ṳ sé̤ṳ Huà-lìng-sê biēng, tĭk-tàu sāi gáu gĭng-dáng. 1506 nièng, hô-gê̤ṳng gì Lò̤-háng-iêng gâe̤ng Uŏk-săng-ăng biáng diē, cĭ hâiu bô gă gióng gì̤tă gióng-dé̤ṳk.
Huà-lìng-sê ké̤ṳk huōi siĕu gūi huòi, dàng nâ diông duâi-dâing. 1958 nièng ùng-ŭk puō-că sèng-hâu ké̤ṳk gáng-diâng ùi Diòng-gĕ̤ng ī nàng dék gô gì chà gióng-dé̤ṳk. 1982 nièng gŭng-buó ùi Guók-gă Dê̤ṳng-diēng Ùng-ŭk Bō̤-hô-dăng-ôi. 1984 nièng áng siŭ-gô-ṳ̀-gô gì nguòng-cáik tṳ̀ng-sĭng siŭ-hók, bêng puói săng-muòng, dĕ̤ng-să̤ puói-dâing, huòi-lòng dēng gióng-dé̤ṳk, ṳ̀ 1989 nièng 10 nguŏk uòng-gĕ̤ng.
[Siŭ-gāi] Gióng-dé̤ṳk Gá-dĭk
Huà-lìng-sê Duâi-dâing diŏh 1958 nièng ùng-ŭk puō-că sèng-hâu ké̤ṳk gáng-diâng chók gióng-có̤ sì-găng, cêu chṳ̄-dâi Nìng-pŏ̤ gì Bō̤-guók-sê Duâi-dâing biéng có̤ Dṳ̆ng-guók Diòng-gĕ̤ng ī nàng dék gô gì chà gióng-dé̤ṳk. Huà-lìng-sê gì gióng-dé̤ṳk hŭng-gáh dó̤i Nĭk-buōng Lièng-chŏng sì-gĭ (12 sié-gé muăk) gì gióng-dé̤ṳk hŭng-gáh ô iā duāi īng-hiōng. 1982 nièng gŭng-buó ùi Guók-gă Dê̤ṳng-diēng Ùng-ŭk Bō̤-hô-dăng-ôi. Sê diē-sié gó ô Sáung-gŏ̤-cṳ̆ng duông-cṳ̆ càng bĭ siŏh méng, Chĭng Kŏng-hĭ nièng-găng 'Huà-lìng-sièng-sê Hiŏng-dĭng-bĭ', Mìng-guók 'Lìng Sĕng Dòng Gé-niêng-bĭ dēng ùng-ŭk.
[Siŭ-gāi] Chăng-kō̤ Ùng-hióng
- Hók-ciŭ Chê-cé Dâ̤ Chék Cháh
