Báe̤k-gĭng
Lài-nguòng: Wikipedia
 |
|
| Hèng-céng-kṳ̆ lôi-biék | Dĭk-hăk-chê |
| Gāng-chĭng | Gĭng |
| Miêng-cék | 1.68 uâng km² |
| Ìng-kēu | 1633 uâng |
| Ìng-gĭng GDP | $7370 |
| Chê-chéu | Cháik-báik, Guók-huài |
| Chê-huă | Nguŏk-gié, Gé̤ṳk-huă |
Báe̤k-gĭng-chê (北京; Ĭng-ngṳ̄: Beijing hĕ̤k Peking) sê Dṳ̆ng-huà Ìng-mìng Gê̤ṳng-huò-guók gì siū-dŭ. Báe̤k-gĭng sê Dṳ̆ng-guók gì céng-dê dṳ̆ng-sĭng, iā sê Dṳ̆ng-guók gì lĭk-sṳ̄ ùng-huá miàng siàng, ô săng chiĕng gūi nièng gì lĭk-sṳ̄, ô ngô ciáh huòng-dièu găk cŭ-uái gióng-lĭk siū-dŭ.
Mŭk-luŏh |
[Siŭ-gāi] Lĭk-sṳ̄
Báe̤k-gĭng siàng gì lĭk-sṳ̄ ô săng chiĕng gūi nièng. Chŭng-chiŭ Ciéng-guók sì-kĭ, Gié-guók (蓟国) cêu diŏh gĭng-dáng gì Báe̤k-gĭng dê-kṳ̆ gióng siàng-chê, Iĕng-guók (燕国) páh iàng Gié-guók ī-hâiu, chiĕng siū-dŭ gáu Gié-siàng, giéu Iĕng-dŭ(燕都) hĕ̤k-chiā Iĕng-gĭng (燕京).
Cìng-dièu sèng-hâu diŏh cŭ-uái siék Gié-gâing, sṳ̆k Guōng-iòng-góng. Să̤-háng kī Guōng-iòng-góng sṳ̆k Hiŭ-ciŭ (幽州). Dĕ̤ng-háng Guŏng-ū-dá̤ diŏh Gié-gâing dé Hiŭ-ciŭ-ché̤ṳ-sṳ̄-buô, 96 nièng bók biéng Guōng-iòng góng-dé.
Să̤-céng sèng-hâu, Guōng-iòng-góng gāi ùi Iĕng-guók. Gáu Sĕk-lĕ̤k-guók Hâiu-diêu bô gāi ùi Iĕng-góng. Hiŭ-ciŭ cê̤ṳ-dê chiĕng duōng Gié-gâing, Iĕng-guók gāi Iĕng-góng, gĭng Cièng-iĕng, Cièng-cìng, Hâiu-iĕng gâe̤ng Báe̤k-ngôi bók biéng.
Sùi-dièu Kăi-huòng (开皇) săng nièng (593 nièng) hié Iĕng-góng, Dâi-ngiĕk (大业) săng nièng (607 nièng), gāi Hiŭ-ciŭ ùi Dáuk-góng (涿郡).
Dòng Ū-dáik (武德) nièng-găng, Dáuk-góng bô gāi duōng miàng Hiŭ-ciŭ, Dĭng-guăng (贞观) nguòng nièng (627 nièng), Hiŭ-ciŭ sṳ̆k Ò̤-báe̤k-dō̤ (河北道), â-dāu bô có̤ Huáng-iòng Ciék-dô-sṳ̄ (范阳节度使) cê̤ṳ-dê. Ăng Lṳ̆k-săng diŏh Ăng-sṳ̄-cĭ-luâng sèng-hâu găk cŭ-uái chĭng Dâi-iĕng huòng-dá̤. Bìng luâng cĭ-hâiu, Hiŭ-ciŭ gŭi Lù-lùng Ciék-cô-sṳ̄ (卢龙节度使).
Lièu Huôi-dùng (會同) nguòng-nièng (938 nièng) diŏh cŭ-uái siék Nàng-gĭng-hiŭ-dŭ-hū (南京幽都府), ùi puôi-dŭ, Kai-tái (开泰) nguòng nièng (1012 nièng) gāi miàng Sék-cĭng-hū (析津府). 1153 nièng, Gĭng-dièu diŏh cŭ-uái ciáng-sék gióng dŭ, miàng-giéu Dŭng-dŭ.
Sìng-gék-sṳ̆-hàng 1216 nièng ciéng-liāng Gĭng-dṳ̆ng-dŭ, Nguòng Cé-nguòng (至元) gāu nièng (1272 nièng), gāi miàng ùi Nguòng-dâi-dŭ (元大都), có̤ Nguòng-dièu gì siū-dŭ.
Mìng chĕ̤, siū-dŭ diŏh Nàng-gĭng, nguòng-dā̤ gì Nuòng-dâi-dŭ gāi miàng Báe̤k-bìng-hū (北平府). Īng-lŏk (永乐) nguòng nièng (1403 nièng) gāi chĭng Báe̤k-gĭng, Īng-lŏk sĕk gāu nièng (1421 nièng) Mìng-dièu ciáng-sék chiĕng-dŭ Báe̤k-gĭng Sông-tiĕng-hū (北京顺天府).
Chĭng-dièu iā diâng dŭ Báe̤k-gĭng, sṳ̆k Dĭk-lâ̤-sēng (直隶省).
1911 nièng Sĭng-hái-gáik-mêng hâiu, Dṳ̆ng-huà-mìng-guók diâng dŭ Nàng-gĭng, 1911 nièng 3 nguŏk Báe̤k-iòng-céng-hū chiĕng-dŭ Báe̤k-gĭng. 1928 nièng Báe̤k-huăk-ciéng-cĕng giék-sók cĭ-hâiu, Dṳ̆ng-huà-mìng-guók diâng dŭ Nàng-gĭng, Báe̤k-gĭng gāi Báe̤k-bìng Dĕk-biék-chê.
1949 nièng 1 nguŏk 31 hô̤, Dṳ̆ng-guók Ìng-mìng Gāi-huóng-gŭng ciéng-liāng Báe̤k-bìng. Dùng nièng 9 nguŏk 27 hô̤, Báe̤k-bìng gāi miàng Báe̤k-gĭng. 1949 nièng 1 nguŏk 1 hô̤, Dṳ̆ng-huà Ìng-mìng Gê̤ṳng-huò-guók dṳ̆ng-iŏng ìng-mìng céng-hū diŏh Báe̤k-gĭng suŏng-gó̤ sìng-lĭk.
[Siŭ-gāi] Hèng-céng Dăng-ôi
Báe̤k-gĭng dàng ô 16 kṳ̆, 2 gâing:
- Chê-hăk-kṳ̆: Dĕ̤ng-siàng-kṳ̆, Să̤-siàng-kṳ̆, Cùng-ùng-kṳ̆, Suŏng-ū-kṳ̆, Dièu-iòng-kṳ̆, Hŭng-dài-kṳ̆, Sĭk-gīng-săng-kṳ̆, Hāi-diêng-kṳ̆, Muòng-tàu-gău-kṳ̆, Bùng-săng-kṳ̆, Tŭng-ciŭ-kṳ̆, Sóng-ngiê-kṳ̆, Chiŏng-bìng-kṳ̆, Dâi-hĭng-kṳ̆, Huài-iù-kṳ̆, Bìng-gók-kṳ̆.
- Gâing: Mĭk-ùng-gâing, Ièng-kéng-gâing.
[Siŭ-gāi] Dê-lī gâe̤ng Ké-hâiu
Báe̤k-gĭng diŏh Huà-báe̤k Bìng-nguòng să̤-báe̤k gièng, kó̤ Tái-hòng-săng ṳ̀ mĕk gâe̤ng Iĕng-săng săng-mĕk, méng hióng Huà-báe̤k Bìng-nguòng. Gâe̤ng Tiĕng-cĭng siŏng lìng béng cà̤ ké̤ṳk Ò̤-báe̤k-dēng bău kī. Báe̤k-gĭng bìng-gĭng hāi-băk 43.5 mī.
Báe̤k-gĭng ké-hâiu sṳ̆k Ŭng-dâi Gié-hŭng Ké-hâiu
[Siŭ-gāi] Gĭng-cá̤
2006 nièng Báe̤k-gĭng-chê Guók-nô̤i Sĕng-sāng-cūng-dĭk dăk 7720.3 é nguòng ìng-mìng-bê (dâi-kái) 1000 é mī-nguòng. Báe̤k-gĭng gì dâ̤-săng-sāng-ngiĕk gŭi-muò diŏh Dṳ̆ng-guók dâi-lṳ̆k siàng-chê diē-sié sê dâ̤-ék duâi gì, ciéng buōng-dê sĕng-sāng cūng-dĭk gì 70%.
Báe̤k-gĭng sê Dṳ̆ng-guók dê̤ṳng-iéu gì gĭng-ṳ̀ng dṳ̆ng-sĭng gâe̤ng săng-ngiĕk dṳ̆ng-sĭng cĭ-ék, iā sâ̤ ngṳ̀ng-òng, bō̤-hiēng-gŭng-sĭ gâe̤ng gĭng-ṳ̀ng giĕ-gáiu gì cūng-buô dŭ siék gáu Báe̤k-gĭng. Dùng-sì, iā sâ̤ Dṳ̆ng-guók guók-iū kié-ngiĕk gì cūng-buô gâe̤ng nguôi-cṳ̆ kié-ngiĕk gì Dṳ̆ng-guók cūng-buô iā diŏh Báe̤k-gĭng.
[Siŭ-gāi] Ùng-huá Ngṳ̄-ngiòng
[Siŭ-gāi] Báe̤k-gĭng-uâ
Báe̤k-gĭng buōng-dê nè̤ng gōng Báe̤k-gĭng-uâ, Báe̤k-gĭng-uâ sê Pū-tŭng-uâ gì gĭ-chū huŏng-ngiòng.
[Siŭ-gāi] Ngiê-sŭk
- Gĭng-kiŏk
- Gĭng-óng-dâi-gū
- Sióng-siăng
- Gīng-tái-làng
[Siŭ-gāi] Lṳ̄-iù
Cuòng chê tūng-gâe̤ng ô 6 ciáh Sié-gái-mì-sāng, 2 ciáh guók-gă-hŭng-gīng-miàng-séng-kṳ̆, 99 ciáh Cuòng-guók Dê̤ṳng-diēng Ùng-ŭk Bō̤-hô Dăng-ôi.
- Sié-gái-mì-sāng: Diòng-sìng, Gó-gṳ̆ng, Ciŭ-kēu-dáing Mì-cī, Ì-huò-huòng, Tiĕng-dàng, Sĕk-săng-lìng.
[Siŭ-gāi] Gáu-ṳ̆k
Báe̤k-gĭng sê Dṳ̆ng-guók Gŏ̤-dēng-iêng-hâu dék sâ̤ gì siàng-chê, 2000-2001 nièng-dô Báe̤k-gĭng ô puō-tŭng gŏ̤-dēng hŏk-hâu 59 ciáh, ngièng-géu-sĕng buòi-iōng gĭ-gáiu 177 gă. Gì-dṳ̆ng bău-guák iā sâ̤ ô-miàng gì dâi-hŏk.
- Buô-hông Báe̤k-gĭng cê̤ṳ-miàng dâi-hŏk
| Báe̤k-gĭng Dâi-hŏk | Chĭng-huà Dâi-hŏk | Dṳ̆ng-guók Ìng-mìng Dâi-hŏk | Báe̤k-gĭng Sṳ̆-huâng Dâi-hŏk | |
| Báe̤k-gĭng Iù-diêng Dâi-hŏk | Báe̤k-gĭng Nguôi-guók-ngṳ̄ Dâi-hŏk | Báe̤k-gĭng Hòng-kŭng-hòng-tiĕng Dâi-hŏk | Dṳ̆ng-guók Céng-huák Dâi-hŏk | |
| Dṳ̆ng-guók Nṳ̀ng-ngiĕk Dâi-hŏk | Dṳ̆ng-guók Duòng-muòi Dâi-hŏk | Báe̤k-gĭng Diêng-īng Hŏk-iêng | Dṳ̆ng-iŏng Hié-kiŏk Hŏk-iêng | |
| Dṳ̆ng-iŏng Mī-sŭk Hŏk-iêng | Báe̤k-gĭng Hiĕk-huò Ĭ-hŏk-iêng | Báe̤k-gĭng Lī-gĕ̤ng Dâi-hŏk | Dṳ̆ng-iŏng Cài-gĭng Dâi-hŏk |
Dṳ̆ng-guók Dâi-lṳ̆k gì Sēng-gék Hèng-céng-kṳ̆
|
