Aigistos
Diwar Wikipedia, an holloueziadur digor
Er vojennouriezh (mitologiezh) c'hresian, Aigistos (en henc'hresianeg Αἴγισθος, Aigisthos[1]) a oa ar mab en doa bet Tiestes digant e verc'h Pelopea, eus tiegezh an Atreided.
[kemmañ] Ar vojenn
Pelopea, a oa bet gwallet gant he zad Tiestes, a c'hanas he mab Aigistos. Dilezel anezhañ a reas war-lerc'h, gant ar vezh. Adkavet e voe gant mesaerien givri ha roet gante da Atreus, roue Argos ha Mikene, e eontr. Savet e voe gant hemañ evel e vab hep goût piv e oa.
An urzh a roas Atreus dezhañ da lazhañ Tiestes (tad ha breur Aigistos war un dro). Koulskoude, dres d'ar mare ma oa o vont da zrouklazhañ anezhañ e anavezas e dad. Asambles e vuntront Atreus ha kemer e lec'h hag e garg.
Diwezhatoc'h, Agamemnon, hêr reizh an tron, a ro lamm da Diestes. Espern a ra buhez Aigistos avat. Tennañ a ra hemañ e vad eus dilec'h Agamemnon da vrezel Troia evit desev e vaouez, ar rouanez Klitaimnestra. Lazhañ a reont ar roue goude e zistro ha ren a reont war ar vro e-pad seizh vloaz kent bezañ muntret d'o zro gant Orestes, mab Agamemnon, bountet gant e c'hoar Elektra.
[kemmañ] Mammennoù
- Apollodoros, Epitome [lenn enlinenn] (II, 14 ; VI, 23) ;
- Aesc'hulos, Agamemnon [lenn enlinenn], ar Goefored [lenn enlinenn] ;
- Euripides, Elektra [lenn enlinenn] ;
- Les Retours [lenn enlinenn] ;
- Sofokles, Elektra [lenn enlinenn].
[kemmañ] Notennoù
- ↑ (diwar aigos, « gavr » en gresianeg)
