Habening
Aus Wikipedia
Habening (auf da Kartn find mas ois Hartpenning) ligd im Nordn vom Landgreis Miaschboch guad drei Kilometa sid-westle vo Hoizkirch weg, Däiz is a ned weid weg. Friara war's amoi a eigene Gmoa, aba etz kheads zua Hoizkirch dazua.
We ma vo Habening redt moand ma normalaweiß Grôßhabening, wos grob gschazt dausend Einwohna hod. Gloahabening is a gleanas Darf an hoibn Kilometa estlich vo Grôßhabening weg. Do ham's a gloane Kabäin, de wo am Heilign Sebastian gweicht is. Außerdem ghern zu Habening no Sufal, Kuaznbeag, Buach, Ôschbeag und Leiddn. Zudem gibts no a Hand voi Oanadn um Habening umma.
Haifige Nam z'Habening san Meia, Reichart, Schmi und Lofara, z'Gloahabening ofd Biachä.
Inhaltsverzeichnis |
[dro werkln] Kirch
Z'Habening hams a wundascheene Kirch im spadgotischn Stil, de wo auf "Maria Heimsuchung" gweicht is. Dafia zuständig is da Pfarra Wachinga, dass de Habeninga a oiwä wos zum Bäddn ham. Da Geistliche Rat, Leonhard Sutor is mittlerweile a scho a wene äidda und ko aus gesundheitliche Grind nimma so guad am Kirchagschäing midarwan, wira gean dad. Pfarrgeimeinde is Habening a eigene, gheard aba zum Pfarrvoband Hoizkirch-Habening-Feching.
[dro werkln] Schbort und Muse
D' Easchde spuid derzeid a da Greisliga und des ned amoi schlecht fia so an gloanan Ort. De Zwoade is momentan a da B-Glass, de miassn aba des Jahr aufbassn, dass' ned obsteing.
Im Winda is as Langlafa hint am Schbortheim recht gfrogt, d'Loipn gäd ibrigens wema an Schnä ham sogar auf Gloahabening und in Richtung Sufal umme und auf Hoizkirch owe.
Außadem gibts no an Schitznvorein, de "Bussardschitzn Habening". Im Winda is oiwä am Migga auf'd Nocht am Schbortheim draus a da Biasnkamastroß Dräining und jädn Freida is "Granzlschiassn", do kochan d'Schabbaras na glei oiwä gscheid auf, im Summa schiass ma Gloakaliba a da Belletsmui unt' (vo Habening aus iwan Deifesgrom a da Nachad vo Riad Richtung Zäi).
An eafoigreichn Stockschitznvorein hams a, voa oim d'Jugend is do recht guad dabei.
Zudem hams z'Habening a Blosmusekabäin, vo dera wo da Reichart Markus da Musemoaschta is. D'Habeninga Musekabäin hod soga zwoa iwaaus heansweade CDs.
[dro werkln] Wirt
Da Klassika z'Habening is nach wia vor da "Neiwirt" (da Heiss). Die Kuchä is sehr fein und vo urig boarisch bis exdravagant ko ma ois bschdäin. Außadem gibts no an "Oidwirt", der voa a baar Jahr nei baud worn is und etz a Via-Sterne-Hotel drin hod. Kulinarisch gibt's sowieso ois, zudem hamm's no an Wäinessbereich und des Wichdigsde: as "Voglhaisl", a rechd a nedde Bar und eingle a de oanzige Meglichkeit z'Habening furt zum geh, wenn ned grod "Rock im Stadl" oder sunst a Feschdl is. Z'Gloahabening is no da "Schreinerwirt", der mittlerweile nimma vom Schreiner Mich gfiad wead, sondan vo wem anders, kocha deans aba imma no exzellent. Alladings gibt's Gricht, dass da "Schreiner" boi zuamacht wega am Bachtvodrog der wo auslaft.
[dro werkln] Gschäfda
Zum Eikafa gibt's z'Habening leida ned recht vui. Aba des Wichdigsde is scho dabei:
1. insa Darfbeggarei vo da Danna Sissi
2. an Biolon vo da Schweizarin mit heavoaragende Kas-, Gmias- und Obstwarn und no a Haufa mearas
3. de Beagzeid, wo ma ois griagd, wos iagendwia mit Wandan, Baeggeh, Graxln oda Autdoaschbort zum doa hod
[dro werkln] Zwäifhundadjahrfeia
Im Jahr 2004 hod Habening d' Zwäifhundadjahrfeia ghabt. Dabei ham de Habeninga recht grôßn Wert auf historische Gnauigkeit glegt. Es hod an historischn Markt, an historischn Umzug und a Biazäid gem.
