Norbert Weber

Vu Wikipedia, der fräier Enzyklopedie.

Den Norbert Weber, gebuer de 16. Februar 1925 zu Iechternach a gestuerwen de 17. Mäerz 2007, war e lëtzebuergesche Kolumnist an Auteur.

Den Norbert Weber war berufflech Staatsbeamten. Hien huet mam Pierre Grégoire 1959 de Ministère des Arts et Sciences (spéider Ministère des Affaires culturelles) an d'Liewe geruff, deen e bis 1975 geleet huet. An där Zäit sinn eng ganz Rei vun kulturellen Institutiounen enstan oder gestärkt ginn, un deenen hien aktiv bedeelegt war, an d'Basis vun enger moderner Kulturpolitik ass geschaaf gin (d'Kulturrevue "Arts et lettres", d'Concert-Zyklen vun de "Soirées de Luxembourg", eng ganz Rei vun kulturellen Accordën, den Neien Theater zu Lëtzebuerg, eng Modernisatioun vun de bestehende Kulturinstituter - Nationalbibliothéik, Staatsarchiv, Nationalmusée - deenen hir wëssenschaftlech Roll gestärkt gouf, asw.).

Wéngst politischen Differenze mam Minister Robert Krieps huet de Norbert Weber 1975 em eng Versetzung gefrot. 1977 huet hien als ee vun deene wéinege géngt d'Zerstéierung vum Iechternacher Löschenhaus protestéiert a weider Opféierungen vun sénge Wierker verbueden, bis datt di Responsabel vun där Dot nët méi am Amt wieren.

Vun 1979 u war e kuerz Zäit Kabinettschef vum Pierre Werner am Kulturministär. En huet sech aus der Kulturpolitik zeréckgezunn, wéi sech fir hien erausgestallt huet, datt säi neie Minister keng kloer Iddien a Saache Kultur hat.

Et gëtt ugeholl, datt hien et war, deen ënnert dem Pseudonym Luussert tëscht 1974 an 1979 am Luxemburger Wort, wéi d'CSV an der Oppositioun war, scharf Kritiken géint d'Regierung Thorn-Vouel-Berg geschriwwen huet.

Seng literaresch Produktioun ëmfaasst Theaterstécker, Lauschterspiller an, ënnert dem Pseudonym Nowe, eng Rei vu Revuen.

1966 huet hien den Nationale Literaturpräis kritt, an 1991 d'Dicks-Rodange-Lentz-Sëlwerplaquette, déi en zeréckgeschéckt huet, wi e gemierkt huet, ween déi Plaquette soss nach kritt huet.

[Änneren] Wierker

De Schéifermisch, 1958 (Theaterstéck iwwert de Michel Pintz)
En Apel fir den Duuscht. E Stéck an zwéin Deeler, 1962
Jean Chalop, 1963, Theaterstéck iwwer de Jean Schalopp, mat Musek vum Edmond Cigrang
Eng Nuecht wéi all aner. E Radiospill fir Chröschtdâg, 1964 (Lauschterspill)
Eng Sëffecht op der Musel. E Stéck mat Zodi,Musék a Gesank, 1966; Musek vum René Eiffes
Dicksereien, 1974, eng Operett
De Bretzert, 1977*
D'Fatzbeidelen, 1980
De Luussert, 1981
Mecht de Kiddel de Minnich?