Abdullah Gül

Vu Wikipedia, der fräier Enzyklopedie.

Den Abdullah Gül, gebuer den 29. Oktober 1950 zu Kayseri, ass en tierkesche Politiker an zur Zäit den 11. President vun der Tierkei.

De Gül huet op der Universitéit vun Istanbul Economie studéiert. Tëscht1983 an 1991 huet hie bei der Islamescher Ëntwécklungsbank geschafft. 1991 gouf en Deputéierten am Tierkesche Parlament. Do stoung hien ufanks dem Necmetin Erbakan senger islamitescher "Wuelfaartspartei" no, huet sech awer no an no vun hire fundamentalisteschen Aussoen distanzéiert.

Bei de Parlamentswale vun 2002 gouf d'AKP, déi Partei, wou de Gül Member ass, mat 363 vu 550 Sëtzer stäerkste Partei. Hie gouf Iwwergankspremier, huet awer wéinst enger Veruerdeelung de 14. Mäerz 2003 dem Recep Tayyip Erdoğan misse Plaz maachen. De Gül gouf Ausseminister a Vizepremier.

De 24. Abrëll 2007 gouf de Gül vun der AKP als Kandidat fir d'Presidentschaftswale virgeschloen. Mee den éischten Tour vun de Walen am Parlament gouf fir ongëlteg erkläert, well net genuch Deputéiert do waren. Parallel dozou koum et zu Kontroversen, well dem Gül seng Fra an der Ëffentlechkeet e Foulard dréit, an dem Gül seng Géigner dat als e Verstouss vum Prinzip vun der Laizitéit gesinn.

Et koum zu virgezunnene Parlamentswalen, bei deenen d'AKP gestäerkt eraus goung. Bei enger neier Wal vum President gouf den Abdullah Gül bei drëtten Tour (bei deenen éischten 2 Tier ginn zwee Drëttel vun der absoluter Zuel vun den Deputéierte gebraucht, beim 3. just eng einfach Majoritéit) zum President gewielt.