Canberra

Úr Wikipediu, frjálsa alfræðiritinu

Canberra er höfuðborg Samveldisins Ástralíu. Hún er í Höfuðborgarsvæði Ástralíu. Nafnið er komið af heiti frumbyggja svæðisins yfir það, og talið þýða staður þar sem fólk kemur saman. Íbúar borgarinnar eru um 340.000.

[breyta] Saga

Hún var stofnuð sérstaklega sem höfuðborg fyrir hið nýja Samveldi í kjölfar deilna milli tveggja stærstu borganna, Melbourne og Sydney um hvar hið nýja þing skyldi vera staðsett. Staðsetningin var valin árið 1908 sem nokkurnvegin mitt á milli borganna tveggja og þægileg staðsetning til að byggja á, með góðum aðgangi að vatni. Árið 1911 sigraði Bandaríkjamaðurinn Walter Burley Griffin alþjóðlega keppni um skipulag borgarinnar. Það er stöðuvatn í miðri borginni nefnt eftir honum. 1913 var borgin nefnd og byrjað var að byggja hana. Árið 1927 flutti samveldisþingið þangað.

Framan af var Canberra hálfgerður smábær, en í dag er Canberra orðin alvöru höfuðborg, allavega hvað varðar stjórnsýsluna. Hún er reyndar ekki mjög fjölmenn, og alls ekki menningarlega höfuðborg. En þar eru samveldisþingið, hæstirétturinn, Háskóli Ástralíu (enska: Australian National University) og fleiri mikilvægar stofnanir.

Í Janúar 2003 riðu skógareldar yfir hluta borgarinnar og 491 heimili brunnu til kaldra kola. Einnig eyðilagðist algjörlega stjörnuskoðunarstöðin á Stromlófelli. Þrátt fyrir þetta létust einungis fjórir.

[breyta] Hverfaskipting

Canberra er skipulögð borg, með einn kjarna og nokkur stór úthverfum, hverju skiptu í mörg smærri hverfi. Flest þessara úthverfa hafa svo eigin kjarna með verslunum og þjónustu og útivistarsvæði, oftast með litlu stöðuvatni. Milli helstu úthverfana eru græn svæði, þar sem náttúran ræður ríkjum og dýr svo sem kengúrur ganga villt.

Aðalúthverfi borgarinnar eru, í stafrófsröð:

• Belconnen
• Gungahlin
• Norður-Canberra
• Suður-Canberra
• Tuggeranong
• Weston Creek
• Woden Dalur

Norður og suður Canberra eru miðbærinn, sitt hvoru megin við Burley Griffin-vatn. Þar að auki eru bærinn Queanbeyan (í Nýja Suður Wales) og þorpið Hall (eitt af mjög fáum sveitarfélögum innan höfuðborgarsvæðisins utan Canberra) hálfgerð úthverfi borgarinnar.

Áströlsk fylki, svæði og höfuðborgir:
Höfuðborgarsvæði Ástralíu	Nýja Suður Wales	Norður-svæðið	Queensland	Suður-Ástralía	Tasmanía	Victoria	Vestur-Ástralía
Canberra	Sydney	Darwin	Brisbane	Adelaide	Hobart	Melbourne	Perth
Norfolkeyja | Jólaeyja | Kókoseyjar | Kóralhafseyjasvæðið | Heard- og McDonaldeyjar | Ástralska suðurskautssvæðið