Gàllia
Un article de Wikipèdia, l'enciclopèdia liura.
Gàllia (o las Gàllias)[1] (del latin Gallia) es lo nom donat per los Romans als territòris, non latin e non german, d'Euròpa occidentala al nòrd de las Pirenèus.
Los territòris de la Gàllia futura èran englobats dins un grand ensemble continental anant de l'Atlantic fins a Danubi e nomenat « Celtica » per los primièrs testimònis escrits : aqueles dels grècs.
Lo gentilici gal galla (reg. gau galla) o gallés -esa (latin Galli) es atestat per lo primièr còp per Caton l'Ancian vèrs -168, per designar los abitants de Celtica qu'avián envasit la planura de Pò (la Gàllia Cisalpina). Lo mot gall, en breton e en irlandés modèrne significa "estrangièr pròche".
Al mièg del sègle I abC, Juli Cesar devesís la Gàllia transalpina en tres partidas : Celtica, Aquitània e Belgica. Tanben, dins sas memòrias de la Guèrra de las Gàllias, Juli Cesar ditz que los pòbles nomenats galleses son diferents entre eles per lo lengatge, las costumas, las leis e que los galleses son separats dels Aquitans per Garona, dels Bèlgas per Marna e Sèina.
La conquèsta romana de Gàllia se realizèt en tres fasas :
- la conquèsta de la Gàllia Cisalpina.
- la conquèsta de Narbonesa.
- la conquèsta de la «Gàllia Comata».
Cisalpina, integrada a Itàlia sos la Republica, devenguèt una extension de Roma. Narbonesa constituiguèt una « província » romana situada fòra Itàlia (lo nom latin de provincia a donat en occitan « Provença »).
Los noms « Gàllia » e « gal/gallés » restèron en usatge per designar las províncias romanas de la rèsta d'aqueles territòris e lors abitants de cultura galloromana.
Tres definicions de la Gàllia pòdon existir :
- Gàllia es lo territòri d'aqueles que se considerèron d'espereles coma Galleses; es lo territòri de Celtica.
- Gàllia dins son ensemble : Celtica, Aquitània e Belgica (definicion de Juli Cesar).
- Gàllia amb las províncias sos autoritats romanas : Celtica, Aquitània, Belgica, Narbonesa e Cisalpina.
Al sègle XIX, Gàllia e los galleses van essèr un mite nacional francés e devenir los avis oficials de França e dels franceses.
[Modificar] Nòtas
- ↑ Dins la nòrma classica se conselha de dire Gàllia e se desconselha lo francisme Gaula*.