Angelo Secchi
Vu Wikipedia, der fräier Enzyklopedie.
Den Angelo Secchi, gebuer de 29. Juni 1818 zu Reggio Emilia, Italien; gestuerwen de 26. Februar 1878 zu Roum war en italieneschen Astronom a Jesuitepater.
De Secchi ass schonns am Alter vu 15 Joer dem Jesuitenuerden bäigetratt a gouf mat 17 Student um Collegio Romano. Do krut hie niewent der Uerdensausbildung d’Méiglechkeet fir Astronomie ze studéieren.
Zu der Zäit vun der revolutionärer Réimescher Republik Roum mussten d’Jesuiten d’Stad verloossen an de Secchi goung mat e puer Jesuiten an den Exil. An dëser Zäit schafft hien an den Observatoiren vu Stonyhurst an England souwéi am Georgetown College zu Washington, D.C., an den USA
Wou hien zeréck op Roum koum, huet hien 1850 d’Leedung vum Observatoire Collegio Romano iwwerholl.
De Secchi zerleet d’Liicht vun de Stäre an der Sonn mat Hëllef vu Prismen. Duerch d’Verdeelung vun de Faarfmuster an donkel Absorptiounslinnen bestëmmt hien déi chemesch Zesummesetzung vu Sonnen- an Stäratmosphären. Hien ënnerscheed véier ënnerscheedlech Spektralklassen.
Dem Secchis seng Aarbechten op dësem Gebitt waren bunnbriechend an hie gëlt als Pionéier vun der Spektralanalys.
De Secchi beschäftegt sech doriwwer eraus mat dem Afloss vun der Sonn op d’Äerdatmosphär an déieren elektresch Erschäinungen souwéi mat der Meteorologie.
De Secchi ënnersicht och d’Liichtduerchléissegkeet um Mëttelmier, wouzou hien extra e speziellt Miessverfahren entwéckelt hat. Déi vun him erfonnten sougenannten Secchischeif gëtt och haut nach an der praktescher Limnologie gebraucht.
Him zu Éieren gouf en 22 km groussen Krater souwéi eng 50 km laang Gebiergsgrupp, d’Montes Secchi, op dem Äerdmound genannt. Hien ass och den Entdecker vun deem no him benannten Koméit C/1853 E1.
[Änneren] Um Spaweck
- (en) Angelo Secchi, S.J.
- (en) Angelo Secchi - the Catholic Encyclopedia
