வானியற்பியல்
கட்டற்ற கலைக்களஞ்சியமான விக்கிபீடியாவில் இருந்து.
வானியற்பியல் (Astrophysics), வானியல் துறையின் ஒரு பிரிவாகும். இது, விண்மீன்கள், நாள்மீன்பேரடைகள், போன்ற வான் பொருட்களின் இயல்புகளான ஒளிர்வு, அடர்த்தி, வெப்பநிலை, வேதியியற் சேர்க்கை போன்றவைகள் அடங்கிய அண்டத்தின் இயற்பியல் பற்றி ஆராயும் துறையாகும். அத்துடன், விண்மீன்களிடை ஊடகம், வான் பொருட்களிடையேயான ஊடுதொடர்புகள் என்பவை பற்றி ஆராய்வதும் இத் துறையின் எல்லையுள் அடங்குகிறது. பாரிய அளவுகள் சார்ந்த கோட்பாட்டு வானியற்பியல் ஆய்வு அண்டவியல் எனப்படுகின்றது.
வானியற்பியல் பரந்த ஒரு துறையாக இருப்பதால், வானியற்பியலாளர்கள், பொறிமுறை (mechanics), மின்காந்தவியல், வெப்ப இயக்கவியல், புள்ளியியற் பொறிமுறை, ஆற்றற்சொட்டுப் பொறிமுறை (quantum mechanics), சார்புக் கோட்பாடு, அணுக்கரு இயற்பியல், துணிக்கை இயற்பியல், அணு இயற்பியல், மூலக்கூற்று இயற்பியல் போன்ற இயற்பியலின் பல துறைகளையும் வானியற்பியல் ஆய்வுகளில் பயன்படுத்துகிறார்கள். நடைமுறையில், தற்கால வானியல் ஆய்வுகளுடன் பெருமளவு இயற்பியல் தொடர்புபட்டுள்ளது.