Dewi Zephaniah Phillips
Oddi ar Wicipedia
Athronydd oedd Dewi Zephaniah Phillips (D. Z. Phillips) (24 Tachwedd, 1934 - 25 Gorffennaf, 2006). Bu'n Athro yn Adran Athroniaeth Coleg Prifysgol Cymru, Abertawe, ac yn Athro Athroniaeth Crefydd ym Mhrifysgol Clarement, California.
Bu'n blaenllaw yn natblygiad athronyddu yn y Gymraeg, a chyfrannodd yn fynych i Efrydiau Athronyddol Adran Athronyddol Urdd Graddedigion Prifysgol Cymru. Enillodd enw rhyngwladol i'w hun ym meysydd moeseg ac athroniaeth crefydd, ac roedd yn awdurdod ar waith Ludwig Wittgenstein. Yn ogystal, cymerai ddiddordeb yn y berthynas rhwng athroniaeth a llenyddiaeth, ac yng ngwaith Simone Weil, a Søren Kierkegaard. Roedd yn olygydd Philosophical Investigations (Blackwells), y Swansea Series in Philosophy (Palgrave), a'r cyfresi Claremont Studies in the Philosophy of Religion a Wittgensteinian Studies.
Fe'i ganwyd yn Nhreforys, Morgannwg, ac fe astudiodd yng Ngholeg y Brifysgol, Abertawe (1952-58) ac ym Mhrifysgol Rhydychen (1958-61). Roedd yn weinidog eglwys yr Annibynwyr yn Fabian Way, Abertawe, rhwng 1959 ac 1961. Cychwynodd ei yrfa academaidd yng Ngholeg y Frenhines, Dundee, ym 1961, cyn ymuno â Choleg Prifysgol Gogledd Cymru rwng 1963 a 1965. Cychwynnodd ddarlithio Athroniaeth ym Mhrifysgol Abertawe ym 1965, ac fe ddaeth yn athro yno ym 1971.
Roedd yn briod â Monica, a chanddynt tri o blant: Steffan, Rhys, ac Aled. Bu'n ymgyrchu dros Addysg Gymraeg yn ardal Abertawe, a thros ddysgu ac ymchwil cyfrwng Cymraeg yn y Brifysgol.
[golygu] Ffynhonellau
Taliesin, Cyfrol 129 (Gaeaf 2006), Academi
[golygu] Llyfryddiaeth
- Athronyddu ar Grefydd
- Dramau Gwenlyn Parry
- R. S. Thomas: Poet of the Hidden God
- J. R. Jones (Writers of Wales)
- Concept of Prayer (1965)
- Through a Darkening Glass (1982)
- From Fantasy to Faith (1991)
- Interventions in Ethics (1992)
- Wittgenstein and Religion (1994)
- Faith After Foundationalism: Platinga-Rorty-Lindbeck-Berger - Critiques and Alternatives (1995)
- Religion and Morality (1996)
- Religion and the Hermeneutics of Contemplation (2001)
- Religion and Friendly Fire: Examining Assumptions in Contemporary Philosophy of Religion (2004)
- The Problem of Evil and the Problem of God (2004)
- In Dialogue with the Greeks: The Presocratics and Reality (2004)
