Luya
Da Wikipedia, ła ençiclopedia libara.
I luya (luhya en te la loro lengoa) i xe on popolo che vive en Kenya (tra el Lago Vitoria e el Monte Elgon), en Uganda e in Tanzania. En Kenya i xe el secondo grupo etnico dopo i kikuyu. I luya del Kenya i xe divisi in 16 sotogrupi: Bukusu, Maragoli, Wanga, Banyore, Marama, Idakho, Kisa, Isukha, Abatsosto, Tiriki, Kabras, Abanyala Abatachoni, Abakhayo, Abamarachi and Abasamia. En Uganda se cata 4 sotogrpi e ono in Tanzania.
[modifica] Storia
I luya i xe rivà en te l’area che i ocupo ancò vegnendo zo da la vale del Nilo. On mito de i luia el parla de Misri (el vecio nome de l’Egito). I xe rivà en tel nord del Kenya co el re Kitang’a. Co i xe rivà sul posto i turkana i gha ciamà el paexe Lokitang (el posto de Kitang). Da li ise saria spostà en Uganda, par poi sistemarse dove i se cata ancò. I luia i xe on grupo bantu, anca se ne le migrazsioni i sa miscià de sicuro co grupi nilotici. I parla na lengoa bantu.
I luya gha resistio i inglexi che volea colonizsar l’Uganda, e poi el Kenya. La resistenzsa la xe continuà anca durante la colonizazsion fin a l’indipendenzsa. I sotogrupi de i kabras e i wango i gha colaborà co i inglexi. Tanti de lori i lavoraa come polizsioti e come fanteria ne l’esercito.
[modifica] Cultura
I luya i vivea en fameje poligame. Ancò la poligamia la xe en declino. L’omo capofameja el xera l’autorità suprema. Dopo de lu, el primo fiol maschio de la prima mojer el xera el pi importante, anca se el podea esar pi pecenin de el fiol de naltra mojer. Le done no le gavea voxe en capitolo e no le podea ereditar. I fioi ciapava i nome del clan, o de i noni, o de le condizsioni atmosferiche a la nasita (par esempio, on nome comun el xe Wafula, piova).
Tuti i luia i se identifegha co on clan, tuti i parenti in linea paterna par le ultime 4 generazsioni (anca i avi i xe considerà vienti). Do luia i se pol sposar solo se i xe de do difarenti clan.
L’iniziazsion la prevede la circoncizsion de omeni e done (clitoridectomia). La circoncizsion feminila la xe en regreso. Tuti i partecipanti a la circoncizsion de on serto ano i diventa compari de età. Sta serimonia la se fa ogni 4 o 5 ani.
Na olta i matrimoni i xera organizsà da i genitori e l’omo gavea da pagar on risarcimento a la fameja de la dona. La fameja de la dona la gavea dirito al risarcimento parché la perdea na forzsa laoro. Le mojere de on omo le podea pasar a so fradel se le diventava vedove.
A la morte de on luya el clan el fa na celebrazsion che la pol durare 40 di. I morti de le fameje pi importanti i vegnea sepolti dove na olta ghera on albero vecio. Dopo el funeral, la fameja piantava on figo su la tomba.
- Portałe Africa: varda łe altre voxe de Wikipedia che łe parla de Africa