Gaetano de Thiene
Da Wikipedia, ła ençiclopedia libara.
Gaetano de Thiene (Vicenzsa, otobre 1480 - Napołi, 7 de agosto 1547) el xe sta on prete, cofondatore de ł'Ordine dei Chiereghi regołari Teatini; el xe anca venerà come santo dała Cexa catołica e el xe anca dito el Santo deła providenzsa.
[modifica] Biografia
Non se sa de sicuro quando che el xe nato, ła fameja ła gera dei conti de Thiene, ultimo dei tre fiołi del conte Gasparo de Thiene (on militare, morto 'ntel 1492) e deła contesa Maria da Porto, terziaria domenicana: el ghe xe sta da el nome de on so zsio pena morto, on canonico profesore de dirito a ł'Università de Padova, che el gera nato a Gaeta.
'Ntel 1504 el se ga laureà a Padova in dirito civiłe e canonico (utroque iure); el xe sta ciamà a Roma come segretario particołare de papa Giulio II 'ntel 1506 e a ghe xe sta dà el titoło de Protonotario Apostołico (el funzsionario deła Curia Romana co ła funzsion de rogare i ati pì inportanti). El xe sta ordinà prete el 30 de setenbre 1516.
El ga scuminzià ł'atività de prete a ł'ospedałe de San Giacomo dei Incurabiłi e el se ga iscrito ała Conpagnia de ł'Oratorio del Divino Amore, 'n'asociazsion de laici e preti nata dal movimento spirituałe e caritativo ai scuminzsi del '500.
Tra el 1520 e el '23 el xe sta a Venezsia, dove el ga fondà l'Ospedałe dei Incurabiłi a ła Giudeca. Tornà a Roma, el ga otegnesto da papa Clemente VII el permeso de fondare, insieme al vescovo de Chieti Gian Pietro Carafa (el futuro papa Paolo IV), on ordine de Chiereghi Regołari]] (diti po' Teatini, dal nome latin de Chieti), co' ło scopo primario de restaurare ntel clero ła regoła primitiva de vita apostołica.
Par difondare el so ordine el ga scuminzsià a viajare: el xe tornà a Venezia, e infine el xe 'nda a Napołi, dove che el xe morto. Par difendare i poareti dai usurai, el ga promoso l'istituzsion del Monte de Pietà, ntel 1539, da dove po' xe nato el Banco de Napołi. El xe morto domenega 7 de agosto 1547 e el xe sta sepełio nte ła basełega de San Pagoło Majore]].
[modifica] El culto
El xe sta beatificà da papa Urbano VIII l'8 de otobre 1629: el xe sta canonizsà el 12 de apriłe 1671 da papa Clemente X.
Ła memoria łiturgica ła ricore el 7 de agosto, el xe el santo patrono deła Contrada del Nicchio, una dełe contrade del Palio de Siena.