Tweetall

Vun Wikipedia

De Tweetall (oder ok Dual) is en Fall bi de Antall in de Grammatik. De Tweetall is en grammatische Form, de bruukt warrt, wenn dat üm nipp un nau twee Lüüd oder Saken geiht. All de annern Spraken ahn Dual bruukt för dree Saken eenfach de Mehrtall (oder wenn dat een gifft, ok de Welktall).

Dat Protoindogermaansche harr en egen Form för de Tweetall. In veel Spraken is disse Form utstorven un blot in en ganz poor enkelte Wöör nableven (beid oder annere [de annere bedüüdt de twete]). Annere Spraken hebbt de Tweetall aver behollen, to’n Bispeel dat Ieslandsche. Ok dat Noordfreesche kennt en Tweetall för welk vun de Pronomens. Dat Araabsche kennt jüstso de Tweetall. In dat Araabsche is se aver al keen Plicht mehr, een kann ok de Mehrtall för twee Saken bruken.

Fakener is dorbi de Poor-Tweetall (Paral) för twee Saken, de en Poor billt, so as de Ogen. Dorbi gifft dat denn noch wedder de lieke Poor-Tweetall (Äquivalenzdual, twee Ogen) un de unlieke Poor-Tweetall (Oppositionsdual), bi de dat Poor en Gegensatz dorstellt (Sanskrit dyāvā bedüüdt „Himmel un Eer“ [de Wuddel vun dyāvā bedüüdt dorbi blot „Himmel“). Blangen de Poor-Tweetall is de allgemene Tweetall weniger faken. Bi de allgemene Tweetall warrt de Tweetall jümmer för twee bruukt, ok wenn de twee keen Poor billt. Extra Formen för de Poor-Tweetall un de allgemene Tweetall hett wohrschienlich dat öllere Tochaarsche hatt.