Bicol Region

Halì sa Wikipedia

An Bicol Region o Kabikolan saro sa 16 na rehiyon kan Republika kan Filipinas na mina-okupar kan Bicol Peninsula sa sur-subangan kan isla nin Luzon.

Komponido ini nin anom na provincia, an Albay, Camarines Norte, Camarines Sur, Catanduanes, Masbate asin Sorsogon. Igwa ini nin sarong nagsasadiring ciudad, an Ciudad nin Naga asin anom na kapartidong ciudad, an Ciudad nin Iriga, Ciudad nin Legazpi, Ciudad nin Ligao, Ciudad nin Masbate, Ciudad nin Sorsogon asin Ciudad nin Tabaco. An mga panrehiyon na sentro iyo an Ciudad nin Legazpi, an panpulitikang sentro asin Ciudad nin Naga, an pinaka-progresibong ciudad kan rehiyon asin pankomersyo, pan-educaccion, pan-financial, panrelihiyon asin pankulturang sentro kaini.

An mga naka-istar digdi inaapod na mga “Bikolano” o "Bikolnon". Nagtataram sinda nin manlaen-laen na tataramon arog kan Bikol Rinconada sa Iriga-Buhi, Bikol Albay sa provincia nin Albay, Bikol Sorsogon sa Sorsogon, Bikol Catanduanes sa Catanduanes asin Bikol Partido sa mga banwaan sa palibot kan Lagonoy Gulf. An Istandarteng Bikol iyo an Bikol Naga na naiintindihan nanggad kan ibang mga tagataram kan iba pang Bikol.