Almendrera
De Biquipedia
| Almendrera | ||||||||||||||||||||
|---|---|---|---|---|---|---|---|---|---|---|---|---|---|---|---|---|---|---|---|---|
 Prunus dulcis |
||||||||||||||||||||
| Clasificazión zentifica | ||||||||||||||||||||
|
||||||||||||||||||||
| Nomenclatura binomial | ||||||||||||||||||||
| Prunus dulcis | ||||||||||||||||||||
| Mill. et D.A.Webb |
l'Almendrera (Prunus dulcis (Mill. et D.A.Webb)) ye un árbol caduzifolio que puet fer enta 10 m d'altaria, con o tranco liso, berde u marronoso cuan ye choben, que se torna griso u més fusco e sulcato cuan se fa biello. As fuellas son simples, con es cantos u ripas dentatos, con flors indibiduals u fendo grupez de 2 á 4, con estrutura pentamera, de color blanca u rosadeta seguntes qué bariedat, e 3-5 cm de diametro. A fruita que fa no ye si que l'almendra, clasicament una drupa de 3-5 cm de lonchitut, con l'exocarpo e ro mesocarpo bastos e fibrosos, e l'endocarpo bien duro. A forma regular de l'almendra á l'árbol ye oblonga u elipsoidal, de color berda e tomentosa, que se torna més fusca en ixucar-se (per l'agüerro, 9 meses dimpués de fer a flors).
l'Almendrera ye un árbol caultibato tepicament en climas calidos, como enna cuenca mediterrania, per a conoixida tendenzia á florixer bien temprano que tien, a cual cosa á sobent le causa ra chelada (e consecuent perduga) d'as flors. En l'Alto Aragón se'n diz que només que uno de cada cuatro años fan bueno istes frutals. No obstante, per a grandiza cantidat d'almendras que produix es años que fa bueno, diz que compensa per toz es que no ne fa garra, pos efeutibament as añadas de buena cullita en naixen á ran d'es 10 u 15 Kg d'istas simients per árbol adulto, simients que cal remarcar-ne o poder calorico que tienen, e d'ixa razón que, d'antigos, estasen tan importants enna dieta.
As benas d'istes árbols se fan fundas e n'ixan augua d'es terrenos més xucos sines de guaire problema, razón per a cual se gosaba á plantar-los en terrenos de secán e marguins á on que altras espezies eban de tener complicazions ta subsistir. A plantada de l'almendrera ye complicada, pos encara que naixen á escape d'as almendras sembratas, as bariedaz bien produtibas son tammién, de regular, as més sensibles e deficultosas de fer escapar en terrenos duros. Ta solbentar-lo, se gosan á plantar enna tierra es piez d'una bariedat més borde, ta que s'embenen enna tierra, e cuan son medratas, se-les mete corte, e se-bi empeltran as partis aerias d'a bariedat quiesta. l'empeltre de l'almendrera ye de tot empregato con altras espezies de frutieros, espezialment con espezies d'o mesmo chenero Prunus, pos asinas se fa probeito d'a capazidat d'es piez d'ésta ta fer bibir as partis superior d'altros arbols en suelos defizils.
[editar] Enrastres externos
Biquiespezies tien un articlo sopre Almendrera.
Se beigan as imachens de Commons sobre l'almendrera.
