Carlo Ruzzini

Da Wikipedia, ła ençiclopedia libara.

Carlo Ruzzini (Venezsia, 11 de novembre 1653 – Venezsia, 5 de genaro 1735) el xe stà un doge venezsian.

[modifica] Vita

Nato da Marco e Caterina Zeno, el gaveva du fradei. El xe sta el zsentotredexeximo doxe deła Republica de Venezsia.

Essendo siòr, el se ga dedicà ała cariera diplomatega, rivando presto in zsima. Ła decadenzs deła Republica de Venezsia e ła guera contro i turchi 'ntel periodo 1684-1699 ła ga conportà ła necesità de catar abiłi diplomateghi e questo a ga avantajà ła cariera del Ruzzini.

Carlo Ruzzini ritrato de Gregorio Lazzarini.

Łe notizsie pì intaresanti sora ła so vida łe se cata durante łe tratative a Carlowitz (1698-1699), impegnà, senza granda fortuana, a otegner dei vantaj par ła so patria.

'Na zserta exitazsion e ła paura de ciapar decixion sbaglià presto i ło ga rexo sgradìo ai altri negozsiadori che, quindi, presto i ło ga tegnù fora dałe decixion pì inportanti.

Sto epixodio no 'l ga blocà ła so cariera, visto che el ga partecipà a altre tratative inportanti (Utrecht, 1712) indove, però, Venezsia, potenzsa ormai decadente e relegà 'nte i confini itałiani, no ła ga avudo gran parte e ła xe sta presto acantonada.

Ł'ultima guera combatua da Venezsia contro i turchi (1714-1718) ła xe finìa co' ła pace de Passarowitz (21 de lujo 1718) che, se da 'na parte ła ga visto ancora come rapresentante diplomatego un pì decixo Ruzzini, da ł'altro ła ga meso in piena evidenzsa ła debołezsa de Venezsia, che ła ga avù poco o gnente da chel tratado.

Pur małà, el ga proseguìo ła so cariera diplomatega come anbasador e presto el xe diventà uno dei personaji pì rispetai del panorama połitego.

Candidadose senzsa suceso ała carica dogałe 'ntel 1722, ła ga otegnua senzsa masa far fadiga 'ntel 1732, con ben quaranta voti so quarantauno.

[modifica] Dogato

Durante el periodo del so curto dogado, tre ani apena, ła vita ła xe pasà tranquiła par Venezsia, ormai sarà 'nte ła piena neutrałità e escluxa dal grande contesto internazsional. Par quanto se sa, el xe sta on omo scrupołoso e sajo, ma poco considerà.