Angelo Querini
Da Wikipedia, ła ençiclopedia libara.
Angelo Querini (Venezsia 1721-1796) el gera on patrizsio venezsian del ramo dei Querini de San Severo. El xe sta senador e el ga coerto ancha altre inportanti cariche 'nte ła Republica de Venezsia. Convinto sostenitore dełe idee de rinovamento, el se ga butà col partito dei riformadori che el xe 'ndà fore regołarmente batù fin ała nomina de ł'ultimo doxe Ludovico Manin che no 'l xe riusìo a fermar el tramonto deła Republica, pasando ała storia come exempio de conservatorismo miope e arogante.
Ła so azsion de contrapoxizsion a ł'ała moderata ła se ga risolto inte 'na carcerazsion durà du ani, a partir da ł'agosto 1761, pasà 'nte ła prexon de Castelvecio (adeso Muxeo Civico) a Verona. El sospeto de esaere portatore de idee łiberałi el gera aconpagnà a queło de aver aderìo ała masoneria.
Disgustà dała vita połitega el se ga ritirà, praticamente ai aresti domiciliari, 'nte ła so viła de Altichiero Padova che ła xe diventà on exenpio parecio noto in Eoropa de domus patrizsia de canpagna, posto indove i se catava i intełetuałi e sałoto cultural. Ła viŁa ła xe sta abełìa 'ntel tenpo da parece statue e ła so strutura ła xe sta tramandà da on livro (Alticchiero, Padova 1787) scrito da Giustiniana Wynne.
Apasionà de architetura, che in quei ani ła diventava speso veicoło de circołazsion dełe idee nove, el se ga dedicà a costruir 'nte ła viła on retrait philosophique, come łs oservava acutamente ła Wynne.
Altichiero el xe sta ł'exenpio de quel utopismo agrario che el ga intrigà parecio in quel periodo i intełetuałi che i se stava verzsendo ałe idee iłuministe.
Ła viła de Altichiero ła xe 'ndà distrutta e adeso a non resta pì gnente.
