Paulo Muwanga
Vun Wikipedia
Paulo Muwanga is en ugandschen Politiker vun’n Ugandschen Volkskongress.
Muwanga weer as Vörsitter vun de Militärkommischoon vun’n 12. bet 22. Mai 1980 de Staatsbaas vun Uganda, nadem siene Partei Präsident Godfrey Binaisa wegputscht harr. Denn hett ene Präsidialkommischoon de Macht övernahmen.
An’n 10. Dezember 1980 weren denn Wahlen. Dat seeg so ut, as wenn de Demokraatsche Partei wunnen harr, doch Muwanga sett sik sülvst as Vörsitter vun de Wahlkommischoon in un hett enen Sieg vun Obote un sienen Ugandschen Volkskongress kund doon.
Ünner Präsident Obote weer Muwanga Minister för Verdedigen un Viezpräsident. Doch siet 1984 keem he mehr un mehr in Gegensatz to Obote. Obote wull de Rebellengruppen in’t Land militäärsch slaan, doch Muwanga wull lever verhanneln. Dat weer mit en Grund dat de Regeren instabil weer un in’n Juli 1985 Bazilio Olara Okello de Macht övernehmen kunn. An’n 1. August möök Okello Muwanga to’n Premierminister vun Uganda. He wull enen Mann ut de ole Regeren övernehmen, dat en beten Kontinuität dor weer. Doch al an’n 25. August müss he dat Amt wedder afgeven, vun wegen dat Yoweri Museveni, Föhrer vun de wichtigste Rebellengrupp, de Natschonale Wedderstandsarmee, em nich akzepteren kunn. Museveni wull nich, dat Lüüd ut de ole Regeren an de Macht blievt. Okello, de Freden mit de Natschonale Wedderstandsarmee wull, kunn kenen Arger mit Museveni bruken un so müss Muwanga sienen Hoot nehmen.
