GNU Free Documentation License
Vu Wikipedia, der fräier Enzyklopedie.
D'GNU Free Documentation License (Kuerzform: GFDL oder GNU-FDL) ass eng Lizenz, deer hiren Text vun der Free Software Foundation ausgeschafft ginn ass. Dës Lizenz huet als Ziel, d'Verbreedung vu fräiem Contenu ze ënnerstëtzen. D'Texter op Wikipedia ginn ënnert der GFDL veröffentlecht.
Opgepasst: fräie Contenu ass keen Domaine public.
Et kann een also net mat engem Wierk ënnert GFDL alles maachen, wat ee wëllt. Et kann een esou e Wierk zwar fräi benotzen an och fräi veränneren, mee all dat just ënnert der Conditioun, datt d'Wierk, esouguer ënnert senger verännerter Form, ëmmer nach ënnert der GFDL bleift.
Dofir muss ee bäi all Reproduktioun oder Representatioun vun engem Wierk ënnert GFDL däitlech uginn, datt dat Wierk, esouguer ënnert senger verännerter Form, ënnert der GFDL steet, an et muss een dann och den integralen engleschen Original-Text vun der GFDL derbäisetzen. Natierlech ass et ubruecht, zu Lëtzebuerg och eng Iwwersetzung op Däitsch, Franséisch oder Lëtzebuergesch vun der GFDL nach derbäizesetzen. Den engleschen Text ass awer bäi Iwwersetzungsënnerscheeder deen eenzeg verbindlechen. Hei um Site vun der Wikipedia ass den integralen engleschen GFDL-Text, mat Iwwersetzung, och derbäigesat, a ka bequeem iwwert en internen (net externen!) Link errecht ginn.
Déi verschidde Mataarbechter un engem Wierk ënnert GFDL bleiwen d'Auteure vun hire Säiten oder Biller. Si mussen also bäi all Reproduktioun an/oder Representatioun vun deem Wierk, esouguer ënnert enger verännerter Form, mat hirem vollen Numm ernimmt ginn. Dëst geschitt bäi Wikipedia-Artikelen duerch d'Historique-Säit, déi bäi all Artikel iwwert e Reider ze erreechen ass, a bäi Wikipedia-Biller duerch Bildbeschreiwungssäit, déi bäi all Bild duerch d'Uklicke vum Bild ze erreechen ass.
Wa mer zesummefaasse wëllen, dann ass dee groussen Ënnerscheed tëschent Domaine Public a GFDL also, datt een, wann een e Wierk, wat ënnert den Domaine public gefall ass, op eng originell Aart a Weis verännert, op déi Verännerung Droits d'auteur kréie kann. Mee wann een e Wierk ënnert GFDL verännert, da kann een ni Droits d'auteur op déi Verännerung kréien, dat verännert Wierk bleift ëmmer nach ënnert GFDL a ka vu jidderengem benotzt a weiderverännert ginn. Ween domadder net averstanen ass, dee kritt vun der GFDL carrément iwwerhaapt net d'Recht, dat GFDL-Wierk ze benotzen oder ze veränneren.
