Adiĝo
El Vikipedio
Adiĝo (itale Adige, germane Etsch, ladine Adesc, Adiç) estas la dua plej longa rivero de Italio, kun longo de 409 km.
Ĝi fontas en Provinco Bolzano ĉe monto Reschenscheideck. Mallonge poste ĝi formas lageton (Reschensee [reŝnze]) 1.482 m altan. De tie ĝi rapide malaltiĝas ĝis ĉ. 900 metroj kaj turniĝas orienten, fluante tra la Venosta Valo (Vinschgau) ĝis Merano (263 m) kaj Bolzano (232 m). Tie de nordo alfluas rivero Isarco (ge. Eisack).
De Boceno Adiĝo fluas suden kaj eliras el la Alpoj ĉe Verono. De tie ĝi turniĝas orienten al Adriatiko kaj disbranĉiĝas al riverdelto. La plej granda branĉo ĉe Porto Fossone enfluas Adriatikon; aliaj branĉoj interplektiĝas kun la delto de Pado.
Inter Boceno kaj Verono la adiĝa valo formas parton de grava trafika vojo nord-suda, kiu transiras la centrajn Alpojn ĉe Pasejo Brenero.
